Në qytetin Ambikapur të Indisë, një nismë unike po ndryshon jetën e njerëzve dhe ndihmon mjedisin.
Në Garbage Café, njerëzit nuk paguajnë me para, por me mbetje plastike. Çdo ditë, qytetarë të uritur sjellin qese plastike, shishe apo mbështjellëse ushqimesh për të marrë ushqim të ngrohtë në këmbim.
“Për çdo kilogram plastikë, ofrojmë një vakt të plotë me oriz, dy lloj perimesh, bukë roti, sallatë dhe turshi,” shpjegon Vinod Kumar Patel, që drejton lokalin në emër të Bashkisë së Ambikapurit. “Për gjysmë kilogrami, ofrojmë mëngjes”.
Ky lokal është bërë një burim shprese për shumë njerëz në nevojë. “Mund të siguroj ushqim për familjen time falë plastikës që mbledh,” thotë Rashmi Mondal. “Kjo e ka ndryshuar jetën tonë.”
Përveç ndihmës sociale, kjo nismë ndihmon edhe në pastrimin e qytetit nga plastika, duke inkurajuar riciklimin dhe ndërgjegjësimin mjedisor. /Skyweb.al
