Prokuroria e Posaçme ka nisur hetim penal ndaj Ministres së Infrastrukturës dhe Energjisë, Belinda Balluku, në kuadër të një dosjeje të re që lidhet me dyshime për korrupsion dhe abuzime me tendera publikë.
Burime të sigurta nga organet e drejtësisë konfirmojnë se çështja është futur në fazën aktive të hetimit, ndërsa janë ndërmarrë disa veprime konkrete verifikimi.
Sipas të dhënave, SPAK ka sekuestruar telefonat dhe kompjuterët personalë të dy bashkëpunëtoreve më të afërta të zv.kryeministres: Sekretares së Përgjithshme të Ministrisë, Viola Haxhiademi, dhe Drejtoreshës së Financave, Evis Mamaj.
Të dyja zyrtaret kanë rol kyç në proceset e menaxhimit të tenderave dhe kontratave publike, dhe konsiderohen si pjesë e “rrethit të brendshëm” të ministres Balluku.
Kontrollet e SPAK janë zhvilluar në zyrat dhe banesat e tyre, ku janë kërkuar dokumente, pajisje elektronike dhe prova të tjera që mund të ndihmojnë në zbardhjen e skemës së dyshuar të korrupsionit brenda Ministrisë së Infrastrukturës dhe Energjisë.
Burime brenda grupit hetimor bëjnë me dije se SPAK po heton lidhjet kontraktuale dhe ndërveprimet e brendshme në ministri, me qëllim identifikimin e çdo abuzimi potencial me fondet publike.
Hetimi pritet të zgjerohet edhe ndaj kompanive të kontraktuara në projektet e mëdha infrastrukturore të viteve të fundit.
