Një raport i fundit i Inspektoratit Shtetëror Shëndetësor ka zbuluar se një pjesë e konsiderueshme e shkollave në Shqipëri vijojnë të përballen me kushte të papërshtatshme për zhvillimin e procesit mësimor. Problemet e evidentuara përfshijnë lagështirë në mjediset e brendshme, amortizim të bazës materiale, tualete jashtë standardeve higjienike dhe mungesë dokumentacioni ligjor e sanitar, çka tregon për një situatë ende larg parametrave të kërkuar për një mjedis të shëndetshëm arsimor.
Sipas raportit vjetor të ISSH-së për vitin 2024, gjatë inspektimeve të kryera në të gjitha nivelet e arsimit nga kopshtet deri te universitetet janë konstatuar probleme që lidhen me infrastrukturën dhe mirëmbajtjen e ambienteve shkollore. Në disa institucione arsimore, sidomos ato në zonat rurale, janë gjetur tualete që nuk i përshtaten grupmoshës së fëmijëve të vegjël apo që nuk përmbushin standardet minimale të higjienës. Në raste të tjera, ndërtesat janë të dëmtuara, me lagështirë në muret e klasave, çka krijon kushte të papërshtatshme për zhvillimin e mësimit dhe rrezik për shëndetin e nxënësve dhe stafit.
Vetëm gjatë vitit 2024, Inspektorati ka vendosur shtatë masa administrative me gjobë, gjashtë vendime për mbyllje provizore institucionesh dhe 439 paralajmërime për shkelje të standardeve higjieno-sanitare. Në total janë kryer mbi 4 mijë inspektime dhe riinspektime në institucione arsimore publike dhe jopublike në të gjithë vendin, duke përfshirë shkolla, kopshte, universitete dhe konvikte.
Raporti nënvizon se shumë nga këto probleme janë të përsëritura nga vitet e kaluara, çka tregon mungesën e investimeve të qëndrueshme në infrastrukturën arsimore. Përmirësimet shpesh kryhen pjesërisht ose me vonesa, ndërsa mungesa e mirëmbajtjes së rregullt i kthen shkollat shumë shpejt në gjendje të amortizuar.
Ekspertët theksojnë se situata e tanishme mund të ndikojë negativisht në shëndetin fizik dhe psikologjik të nxënësve, duke rritur rrezikun e sëmundjeve respiratore dhe ulur përqendrimin gjatë mësimit. Ata bëjnë thirrje për ndërhyrje të menjëhershme nga institucionet përkatëse, veçanërisht në përmirësimin e kushteve sanitare dhe rehabilitimin e ambienteve me lagështirë.
Ndërsa vëmendja shpesh përqendrohet tek cilësia e arsimit dhe kurrikulat, raporti i ISSH-së kujton se mjedisi ku zhvillohet procesi mësimor është po aq i rëndësishëm. Një shkollë e pastër, e sigurt dhe e mirëmbajtur nuk është vetëm domosdoshmëri higjienike, por edhe themel i çdo sistemi arsimor që synon zhvillim dhe mirëqenie për fëmijët. /Skyweb.al
