Nën tingujt e këngës “I Did it my Ëay” e Frank Sinatra-s, ish kryeministri I Shqipërisë, Fatos Nano po përcillet për në banesën e fundit. Nano do të prehet në varrezat e Sharrës.
Në ceremoninë e homazheve, Kryeministri Edi Rama tha se Fatos Nano “i dha Partisë Socialiste një frymë të re”.
“Në selinë e partisë qëndron një foto e tij, që për mua është pamja më domëthënëse”, deklaroi Rama.
“Askush nuk mund të vërë në dyshim se kontributi i tij për Kosovën e shqiptarët e rendit në rreshtat e historisë së nderit të Shqipërisë”, shtoi Rama.
“Sa të paskan dashur mor burrë i dheut”, tha kryeministri përpara arkmortit të Nanos, duke iu referuar mesazheve të kundërshtarëve politikë për ndarjen nga jeta të tij.
I biri i të ndjerit, Sokol Nano, dha fjalimin e tij të lamtumirës, duke falenderuar fillimisht të gjithë për dashurinë e treguar ndaj politikanit, Fatos Nano.
Fjalën e saj të lamtumirës, bashkëshortja e politikanit të ndjerë, Xhoana Nano, e nisi duke e cilësuar këtë të dielë, ditën më të errët të jetës së saj.
“Të dashur miq e dashamirës, i nderuar zoti kryeministër! Dita e sotme është dita më e errët dhe e trishtuar e jetës! Po ndahem me njeriun me të cilin kalova një çerek shekulli jetë e me të cilin më lidhën ëndrrat, shpresat e zhgënjimet e përbashkëta! Është një nga ato ditë që nuk do doja ta jetoja kurrë, e tillë është kjo ditë edhe për fëmijët tanë! Unë një vajzë fare e re, rashë në dashuri me Fatosin, atëherë nuk e kuptoja pse, por tani e di, kisha rënë në dashuri jo thjesht me atë si person, por njëkohësisht edhe me vizionin e një Shqipërie ndryshe, komplet tjetër nga ajo që jetonim, që përherë e më shumë lipsej të largohej nga barbaria, primitivja”, tha Xhoana Nano. /Skyweb.al
