Ministri i Financave, Petrit Malaj, ka bërë të ditur se pensionistët do të përfitojnë një bonus fundviti nga 10 mijë deri në 15 mijë lekë, në varësi të nivelit të pensionit që marrin.
Sipas Malajt, pensionistët me pension deri në 20 mijë lekë do të marrin 15 mijë lekë bonus, ndërsa ata që kanë pension mbi 20 mijë lekë do të përfitojnë 10 mijë lekë.
Në mbledhjen e Komisionit të Ligjeve, ministri theksoi gjithashtu se qeveria po punon për rritjen graduale të pensioneve, me synimin që deri në fund të mandatit pensioni minimal të arrijë 200 euro dhe pensioni mesatar 400 euro.
“Jemi duke bashkëpunuar me Ministrinë e Ekonomisë për rritjen e pensioneve, dhe përgjigjet do të reflektohen në buxhetin e vitit 2026,” deklaroi Malaj.
Sipas Ministrisë së Financave, kjo masë është pjesë e paketës së mbështetjes sociale për fundvitin, e cila synon të lehtësojë kostot e jetesës për pensionistët dhe të forcojë sigurinë financiare të kësaj shtrese./ skyweb.al
