Skyweb.al ka parë dosjen hetimore të SPAK për zëvendëskryeministren Belinda Balluku, ku zbulohet komunikimi i saj me ish-kreun e ARRSH-së, Evis Berberi, lidhur me tenderin e tunelit të Llogarasë.
Sipas dosjes, bisedat tregojnë qartë se si manipulohej procedura e tenderit, e cila në fund iu dha një kompanie turke me ofertë 50 milionë euro më të shtrenjtë se ajo e “Gjoka Konstruksion”.
Fillimisht, tenderi u anulua, ndonëse “Gjoka” kishte ofruar 140 milionë euro.
DOSJA/ Dalin SMS-të mes Ballukut dhe Berberit: Visi të konsideroj të afërt, merre dhe ta gëzosh!
Në procedurën e dytë, fakti që fondi limit u rrit në rreth 190 milionë euro bëri të mundur që turqit të shpalleshin fitues, ndërsa më pas i deleguan punimet si nënkontraktor pikërisht kompanisë “Gjoka”.
Në bisedat e siguruara nga aplikacioni “Signal Private Messenger”, mes Belinda Ballukut dhe Evis Berberit, SPAK ka dokumentuar këtë shkëmbim mesazhesh:
Belinda Balluku: “Mendoj ta anullojme, skualifikoji të gjithë.”
Evis Berberi: “Jam mëse dakord. Se kam diçka që s’më kuadron në gjithë situatën. Kur e do, sot apo nesër? Megjithatë, nëse të duhet, ja këndoj këngën, s’ma ndjen shumë për asnjë dhe e çoj ku duhet.”
Belinda Balluku: “Jo jo, kam atë ndjesinë time që nuk duhet.”
Evis Berberi: “E ke të frikshme ndjesinë. Kur e do?”
Belinda Balluku: “Më jep afatet nëse e shpallim nesër.”
Evis Berberi: “Max 24 mars ankimimi në MIE, në 25 i kthejmë përgjigje. Max 4 prill ankohet në KPP dhe min 14 – max 22 prill kthen KPP përgjigje. Duhet ta rishpallim menjëherë që t’i djegim afatet e ankimimit në gjykatë.”
Në datën 18 mars 2020, në orën 11:30, Balluku i dërgon Berberit mesazhin:
“Po si ke lajmëruar të tjerët për anulim? Mbylleni sot me urgjencë.”
Në orën 11:31, Berberi i përgjigjet:
“Po, gysin sot e ke të mbaruar.”
Në orën 17:09, Berberi i dërgon mesazhin përfundimtar:
“E mbyllëm.”
/skyweb.al
