Prokuroria e Përgjithshme ka shpallur fituesin e tenderit për mirëmbajtjen, rinovimin dhe implementimin e sistemit të përgjimeve për tre vitet e ardhshme.
Kompania italiane “IPS” S.P.A, me seli në Romë, do të marrë një vlerë kontrate prej 660 mijë eurosh, pas një procedure me negocim pa shpallje paraprake,shkruan skyweb.al.
Tenderi me referencë Nr. 34/3, datë 26.03.2025, u publikua në Buletinin e Njoftimeve Publike më 14 prill 2025 dhe parashikonte një kontratë trevjeçare për “mirëmbajtje të sistemit të përgjimit, rinovim me pajisje, instalim dhe implementim”.
Në këtë procedurë mori pjesë vetëm një ofertues, kompania “IPS” S.P.A, e cila paraqiti ofertën me çmimin më të ulët dhe u shpall fituese sipas Prokurorisë së Përgjithshme. Kontrata do të mbulojë shërbimet teknike të sistemit të përgjimeve që administrohen nga Prokuroria e Përgjithshme.
Në vitin 2024, sipas raportimeve zyrtare të Prokurorisë së Përgjithshme, janë përgjuar 2361 numra telefoni nga prokuroritë e rretheve, në kuadër të hetimeve për krime kundër personit, çështje narkotikësh, vjedhje dhe mashtrime.
Në funksion të rritjes së përgjimeve, sidomos në prag të zgjedhjeve të 11 majit, prokuroritë lokale, së bashku me një prokuror të SPAK dhe grupe hetimore nga BKH, kanë marrë një rol kyç për hetimin e krimeve zgjedhore, një sfidë e madhe për sistemin e drejtësisë.
Ligji shqiptar mbi përgjimet elektronike përcakton qartë rolin e “bërthamës komanduese elektronike”, pajisjes që ndodhet në administrim të Zyrës së Prokurorit të Përgjithshëm. Kjo bërthamë teknologjike kontrollon autorizimet për nisjen ose ndalimin e përgjimeve ndaj pajisjeve të komunikimit elektronik.
Kontrata e re me kompaninë italiane synon të garantojë funksionimin pa ndërprerje të kësaj infrastrukture delikate, në një moment kur kapacitetet hetimore të Prokurorisë kërkojnë efikasitet dhe siguri më të lartë teknologjike. /skyweb.al
