Kompania gjermane Volkswagen ka planifikuar shkurtimin e 100 mijë vende pune. Por, problemi i Volkswagen nuk është më vetëm sa punonjës do të largohen apo cilat fabrika mund të mbyllen. Në thelb, gjiganti gjerman po përballet me një krizë më të madhe: Modeli mbi të cilin u ndërtua suksesi i tij për dekada nuk po funksionon më si më parë.
Sipas Reuters, fabrikat e grupit në Gjermani po humbasin ngarkesë dhe kapacitetet e pashfrytëzuara po bëhen gjithnjë e më të vështira për t’u mbajtur.
Të dhënat e cituara tregojnë se fabrikat gjermane të Volkswagen pritet të punojnë me rreth 81% të kapacitetit standard në vitin 2026, ndërsa deri në fund të dekadës ky nivel mund të bjerë në 73%.
Rasti më domethënës është fabrika në Zwickau, e cila në vitin 2026 pritet të jetë në nivelin 88%, por deri në vitin 2030 mund të zbresë në vetëm 42%.
Kjo do të thotë se Volkswagen ka fabrika, punonjës dhe struktura të mëdha në Gjermani, por jo më të njëjtën kërkesë prodhimi për t’i mbajtur të gjitha në punë.
Presioni vjen nga disa drejtime njëherësh: Kostot e larta në Gjermani, konkurrenca e fortë nga Kina, tarifat amerikane për importet dhe kalimi i vështirë drejt makinave elektrike.
Për vite me radhë, Volkswagen u mbështet te fuqia industriale gjermane, prodhimi masiv dhe eksportet. Por tani, ky model po goditet nga prodhuesit kinezë, që po ofrojnë makina elektrike më konkurruese dhe me kosto më të ulët.
Kompania thotë se po ul kompleksitetin, po rishikon investimet dhe po përqendrohet te teknologjitë që mund ta bëjnë më konkurruese në një treg më të vështirë.
“Po forcojmë portofolin e investimeve dhe po thjeshtojmë strukturat e kompanisë. Dhe po, do të duhet të ulim edhe kapacitetet e tepërta”, tha një zëdhënës i Volkswagen.
Por për sindikatat, problemi nuk mund të zgjidhet duke dobësuar prodhimin gjerman.
IG Metall ka mobilizuar punëtorët në rreth 20 njësi të grupit, duke kërkuar mbrojtjen e fabrikave dhe të vendeve të punës. “Kjo është një mesazh i qartë për bordin: Jo para syve tanë”, tha presidentja e IG Metall, Christiane Benner.
Ajo kërkoi që kompania dhe politika gjermane të gjejnë zgjidhje për të mbushur kapacitetet e fabrikave dhe për të mbrojtur industrinë nga konkurrenca e padrejtë.
Kriza e Volkswagen është sinjal për të gjithë industrinë europiane të makinave: Nëse prodhimi mbetet i shtrenjtë, tregjet bëhen më proteksioniste dhe Kina fiton terren në makinat elektrike, edhe kampionët më të mëdhenj industrialë rrezikojnë të humbasin avantazhin që kishin prej dekadash. /skyweb.al
