Monedhat e forta si euro, dollari amerikan dhe paundi britanik e kanë nisur javën në rënie ndaj lekut, duke humbur ndjeshëm vlerë krahasuar me fundjavën e kaluar.
Sipas kursit zyrtar të Bankës së Shqipërisë, një euro u këmbye sot mesatarisht me 98.20 lekë, nga 98.51 lekë që këmbehej të premten.
Situata paraqitet e ngjashme edhe për dollarin dhe paundin britanik, të cilët kanë regjistruar gjithashtu rënie përballë lekut.
Fenomeni i dobësimit të monedhave të huaja ndaj lekut është një tendencë që po shfaqet prej dy vitesh, por kësaj radhe duket se ndikim ka pasur edhe java e fundit e fushatës elektorale.
Tradicionalisht, në prag të zgjedhjeve, rritja e shpenzimeve për aktivitete elektorale dhe qarkullimi më i madh i valutës në vend kanë kontribuar në forcimin e lekut dhe në dobësimin e euros.
Ky model është vërejtur edhe në zgjedhjet e kaluara, ku java e fundit e fushatës është shoqëruar me luhatje në tregun valutor në favor të monedhës vendase. /skyweb.al
