Një specie invazive dhe shumë toksike, e njohur si peshku i fryrë (Lagocephalus sceleratus), po përhapet me shpejtësi në ujërat e Detit Mesdhe, duke ngritur shqetësime serioze për biodiversitetin detar dhe sigurinë e njerëzve.
Ekspertët paralajmërojnë se kjo specie përmban tetrodotoksinë, një neurotoksinë jashtëzakonisht të rrezikshme, e cila mund të shkaktojë paralizë, probleme të rënda në frymëmarrje dhe në raste ekstreme edhe vdekje. Konsumimi i peshkut konsiderohet veçanërisht i rrezikshëm, pasi nuk ekziston një antidot specifik kundër helmimit.
Sipas studiuesve, përhapja e peshkut të fryrë lidhet me rritjen e temperaturave të ujërave dhe migrimin e specieve nga Deti i Kuq drejt Mesdheut përmes Kanalit të Suezit. Prania e tij është raportuar në disa zona të Mesdheut dhe së fundmi po afrohet edhe në brigjet e Adriatikut.
Përveç rrezikut për shëndetin e njeriut, kjo specie dëmton ekosistemet detare, pasi ushqehet me organizma vendas dhe shkakton dëme në rrjetat e peshkatarëve. Autoritetet dhe specialistët u bëjnë thirrje peshkatarëve dhe qytetarëve të shmangin kontaktin dhe konsumimin e këtij peshku në rast se e hasin gjatë aktiviteteve të peshkimit apo në bregdet. /skyweb.al
