Barnat që do të mbulohen nga skema e rimbursimit për vitin 2026 janë zyrtarizuar tashmë me publikimin e listës së re në Fletoren Zyrtare. Dokumenti përcakton medikamentet që do të financohen nga Fondi i Sigurimit të Detyrueshëm të Kujdesit Shëndetësor, si edhe nivelin e mbulimit për secilin trajtim.
Sipas vendimit, pacientët do të përfitojnë rimbursim nga 50% deri në 100% të çmimit të barnave, në varësi të diagnozës, kategorisë së sëmundjes dhe terapisë së përdorur. Lista përfshin ilaçe për sëmundjet e zemrës dhe qarkullimit të gjakut, diabetin, patologjitë neurologjike, sëmundjet autoimune, terapitë hormonale dhe trajtimet kundër kancerit.
Në skemën e re janë futur edhe medikamente të avancuara biologjike dhe imunoterapi me kosto shumë të lartë, që përdoren kryesisht për trajtime të specializuara në onkologji dhe sëmundje të rralla. Disa prej këtyre terapive kushtojnë qindra mijëra lekë për një dozë të vetme, por do të financohen plotësisht nga shteti për pacientët përfitues.
Lista e publikuar përfshin gjithashtu trajtime moderne për sklerozën multiple, hepatitet virale dhe patologji të tjera komplekse, duke zgjeruar aksesin e pacientëve në terapi që deri pak vite më parë ishin të paarritshme për shkak të kostos së lartë.
Vendimi i qeverisë i jep të drejtë Fondit të Sigurimit të Detyrueshëm të Kujdesit Shëndetësor të vendosë kufizime mbi përdorimin e barnave dhe kohëzgjatjen e trajtimeve, bazuar në kritere mjekësore, sociale dhe ekonomike. Po ashtu, institucioni do të negociojë me kompanitë farmaceutike për uljen e çmimeve, me qëllim mbajtjen nën kontroll të shpenzimeve të skemës së rimbursimit.
Në dokument janë përcaktuar edhe marzhet e fitimit për tregtimin e barnave të rimbursueshme, me 8% për shitjen me shumicë dhe 24% për shitjen në farmaci.
