Komisioni për Europën dhe Punët e Jashtme u mblodh sot pa praninë e deputetëve opozitarë, të cilët ndodheshin në terren në kuadër të përgatitjeve për protestën e paralajmëruar për ditën e nesërme.
Gjatë mbledhjes, komisioni diskutoi dhe miratoi disa ndryshime të rëndësishme në Kodin Penal, si dhe projektligje të tjera që lidhen me sigurinë publike, median dhe dhunën në familje.
Një nga ndryshimet kryesore ka të bëjë me parkimin dysh të automjeteve. Deri më tani kjo shkelje ndëshkohej vetëm me gjobë, por me ndryshimet e reja parashikohet që parkimi në rresht të dytë të kthehet në vepër penale, e dënueshme edhe me burg.
Relatori i projektligjit, deputeti socialist Ervin Hoxha, sqaroi se ashpërsimi i masës synon rritjen e sigurisë rrugore dhe mbrojtjen e jetës së qytetarëve, duke ndëshkuar bllokimin e qarkullimit dhe pengimin e mjeteve emergjente. Sipas tij, ndryshimet kanë për qëllim edhe parandalimin e bllokimeve totale të rrugëve, garantimin e lëvizjes së lirë për këmbësorët, forcimin e efektit parandalues të ligjit penal dhe krijimin e një kuadri më të qartë për ndërhyrjen e institucioneve në situata emergjente.
Në të njëjtën paketë ndryshimesh është parashikuar edhe dekriminalizimi i shpifjes, si dhe rritja e mbrojtjes ligjore për gazetarët gjatë ushtrimit të detyrës.
Sipas ndryshimeve të miratuara, sulmi, kërcënimi apo intimidimi ndaj një gazetari do të trajtohet me të njëjtin seriozitet si ndaj një punonjësi të shtetit. Relatori Ervin Hoxha deklaroi se goditja e një gazetari në detyrë do të dënohet me burg nga 1 deri në 5 vite.
Komisioni miratoi gjithashtu edhe ndryshime në ligjin për importin, eksportin dhe transitin e armëve të zjarrit, komponentëve të tyre dhe municioneve. Ministri i Mbrojtjes, Pirro Vengu, sqaroi se ndryshimet synojnë ngritjen e një sistemi të ri elektronik kontrolli, me qëllim forcimin e monitorimit dhe parandalimin e trafikut të paligjshëm të armëve.
