Gjykata e Lartë ka rrëzuar kërkesën e kompanisë së ndërtimit “Agi Kons”, në pronësi të biznesmenit Gentian Sula, e cila kërkonte heqjen e sekuestros për një apartament në zonën “Kodra e Diellit” në Tiranë, për të cilin prokuroria dyshon se është pasuri e fshehur e kryebashkiakut të arrestuar, Erion Veliaj.
Kolegji Penal i Gjykatës së Lartë njoftoi këtë të enjte (22 janar 2026), se ka vendosur “mospranimin e rekursit të shoqërisë Agi Kons për shfuqizimin e vendimit të Gjykatës së Posaçme të Apelit, nr.38, dt. 17 qershor 2025”.
“Boldnews.al” verifikoi vendimin e Apelit për këtë rast dhe u konstatua se bëhej fjalë për sekuestrimin e një apartamenti në zonën e “Kodrës së Diellit”, një kat sipër apartamentit zyrtar të bashkëshortëve Erion Veliaj dhe Ajola Xoxa.
Në kërkesën e saj, “Agi Kons” shpk pretendon se apartamenti është në pronësi të saj, si ndërtuese e të gjithë kompleksit rezidencial dhe se Veliaj e bashkëshortja e tij, Xoxa, nuk kanë asnjë të drejtë reale apo pronësore mbi atë pasuri.
Megjithatë, Prokuroria e Posaçme ka krijuar dyshime të arsyeshme se apartamenti është “de fakto” në pronësi të dyshes Veliaj-Xoxa. Sipas SPAK-ut, ajo është një pasuri e fshehur dhe dyshohet se është produkt i marrëdhënies korruptive mes Veliajt dhe sipërmarrësit Gent Sula.
Apartamenti “i fshehur”
Nw kuadër të hetimeve për “korrupsion” e “pastrim parash”, Prokuroria e Posaçme tha se ka zbuluar një rast, ku Sula, sipas grupit hetimor, ka bërë përpjekje për të mbuluar një pasuri të fshehur të Erion Veliajt, një apartament në kompleksin “Kodra e Diellit” në Tiranë, ndërtuar prej shoqërisë së tij, “Agikons”.
Erion Veliaj dhe familja e tij jetojnë në katin e katërt të një godine 5-katëshe në zonën rezidenciale, në Selitë të kryeqytetit. Ky apartament është blerë vite më parë nga Arben dhe Valbona Xoxa dhe më tej i është dhuruar vajzës së tyre, Ajola Xoxa.
Prej vitesh, ky është apartamenti zyrtar i çiftit Xoxe-Veliaj, i deklaruar edhe në formularët e pasurisë pranë Inspektoratit të Lartë të Deklarimit dhe Kontrollit të Pasurive e Konfliktit të Interesave (ILDKPKI).
Megjithatë, hetimet e Prokurorisë së Posaçme kanë krijuar dyshimin se “çifti i parë” i Tiranës ka edhe një pasuri të fshehur, një apartament në katin e pestë të godinës ku jetojnë, saktësisht mbi banesën e tyre.
Në apartament që dyshohet se është i fshehur nga Veliaj, ka jetuar prej vitit 2011 e deri në vitin 2019 miku i ngushtë i familjes së kryebashkiakut, aktori i kabaresë “Portokalli”, Gazmend Paja.
I pyetur nga grupi hetimor, Paja ka deklaruar se është larguar nga ai apartament në vitin 2019, pasi, në marrëveshje me ndërtuesin Gentian Sula, ka vendosur ta zëvendësojë me një banesë tjetër më të madhe, për shkak të nevojave familjare.
Pas vitit 2019, e konkretisht rreth vitit 2020-2021, SPAK ka identifikuar komunikime të shumta mes Ajola Xoxes dhe personave të ndryshëm mbi rikonstruksionin dhe mobilimin e apartamentit të lënë bosh nga Gazmend Paja.
Falë këtyre komunikimeve dhe detaje të zbuluara gjatë hetimit, Prokuroria e Posaçme ka krijuar dyshimet të arsyeshme se familja e kryebashkiakut të Tiranës është pronare reale e atij apartamenti, megjithëse formalisht, ai figuron i regjistruar në pronësi të “AgiKons” të ndërtuesit Gentian Sula.
Tentativa për të mbuluar apartamentin
Bazuar në informacionet për një apartament të fshehur të Veliajt, në 14 Prill 2025, Prokuroria e Posaçme kreu një kontroll në banesën në katin e pestë të godinës ku jeton kryebashkiaku.
Apartamenti rezultonte se i ishte dhënë me qira një personi, R. C. Qiramarrësi deklaroi se jeton në atë apartament prej Shtatorit 2024. Ai i tha grupit hetimor se e kishte gjetur këtë apartament në njoftimet e agjencisë imobiliare “Future Home”. R.C. thotë gjithashtu se, në momentin që e ka parë këtë apartament, në Gusht të vitit të kaluar, aty po bëheshin punime rifiniture, si lyerje, ndryshim të pajisjeve hidrosanitare dhe mobilim
Kontrata e qirasë, nëpërmjet agjencisë imobiliare, rezulton se është nënshkruar mes R.C dhe shoqërisë “AgiKons”. Por, Prokuroria e Posaçme, dyshon se shoqëria ndërtuese e Gentian Sulës është përfshirë në këtë kontratë, me qëllim për të fshehur pronësinë reale të apartamentit.
Pjesë nga dosja hetimore për veprimet e dyshimta të ndërtuesit Gentian Sula
“…Për organin procedues, krijohet bindja se shtetasi Gentian Sula, përfaqësues i ‘Agikons’, me simulimin aktiv të një marrëdhënieje qiraje, nëpërmjet nxjerrjes së objektit në një agjenci dhe më tej në nënshkrimin e kontratës së qirasë dt.18 Shtator 2024 (me shtetasin R.C), ka kryer veprime objektive, të cilat kanë synuar që të justifikojë përfitimin e parregullt që bashkëshortët Veliaj-Xoxa, kanë marrë për shkak të funksionit si kryetar Bashkie të Erion Veliajt”, thuhet në materialin e mbylljes së hetimeve të Prokuroria e Posaçme.
Më tej, SPAK-u deklaron: “Ky përfitim i parregullt (i çiftit Veliaj-Xoxe)….buron nga një marrëdhënie e gjatë me natyrë korruptive, e kushtëzuar kjo nga raportet e vazhdueshme të shtetasit Gentian Sula (përfaqësues i “AgiKons”) me Bashkinë e Tiranës…”.
Dollapi zbuloi apartamentin
Prokuroria e Posaçme thotë se fillesa për zbulimin e një apartamenti të fshehur nga Erion Veliaj, një kat mbi banesën e tij zyrtare tek zona e ‘Kodrës së Diellit”, ka qenë një dollap.
Në kuadër të hetimeve për kryebashkiakun e arrestuar të Tiranës dhe bashkëshortes së tij, Ajola Xoxe, për veprat penale të korrupsionit e pastrimit të parave, prokurorët kanë administruar të dhënat e një mobilieri, Arlind Kodra.
Ky i fundit ka mbajtur në kompjuterin e tij të dhënat mbi punimet që ka kryer për llogari të Ajola Xoxes në shtëpinë e saj tek Kodra e Diellit, si edhe në një vilë në Qerret.
Mes të dhënave kompjuterike, prokurorët kanë identifikuar informacion, të shënuar me emërtimin “kati lart”. Mobilieri është pyetur për këtë informacion dhe ka deklaruar se është shoqëruar në vitin 2021 nga Ajola tek një apartament, që gjendet mbi shtëpinë ekzistuese të saj, ku ka marrë masat për realizimin e disa dollapëve.
Ai ka deklaruar se për këtë apartament ka ndërtuar vetëm një dollap. Prokuroria e Posaçme, mbi bazën e këtij informacioni, si edhe të dhënave të tjera indirekte, ka kryer një kontroll mbi këtë apartament, që gjendet në katin e pestë, saktësisht mbi banesën ku jetojnë Ajola Xoxe dhe Erion Veliaj.
Në 14 Prill 2025, agjentët e Byrosë Kombëtare të Hetimit kryen një kontroll në apartamentin mbi banesën zyrtare të Erion Veliajt.
Fotot e kryera nga agjentët e Byrosë së Hetimit gjatë kontrollit në këtë banesë iu paraqitën mobilierit Arlind Kodra. Ky i fundit u shpreh se dollapi që gjendet në shtëpinë e dhënë me qira ishte pikërisht ai që kishte bërë ai më parë, pas bisedës me Ajola Xoxen.
Mbi bazën e kësaj të dhëne, prokurorët iu rikthyen sërish komunikimeve telefonike, të cilat kishin sekuestruar më herët nga personat nën hetim.
Në ato komunikime zbuluan mesazhe të shkëmbyera mes Ajolës dhe arkitektit Olsi Eftimi, mik i familjes dhe njëkohësisht personi që ka kontribuuar në arredimin e banesave të familjes Xoxe-Veliaj, në Tiranë dhe Qerret.
Në ato komunikime u evidentuan biseda, të cilat lidheshin pikërisht me apartamentin sipër banesës së Ajolës dhe Veliajt. Aty flitej për mundësinë e krijimit të shkallëve të brendshme, të cilat do të lidhnin dy apartamentet e të tjera detaje teknike.
Arkitekti Olsi Eftimi ka pranuar para prokurorëve se ka shkuar në atë apartament, por vetëm për të kryer disa rregullime, pasi pikonte ujë në tavanin e shtëpisë së Ajolës. Megjithatë, Prokuroria e Posaçme deklaron se ka shumë të dhëna të tjera, të cilët i kanë krijuar bindjes se ai apartament është një pasuri e fshehur e Erion Veliajt dhe Ajola Xoxës./Boldnews.al
