Ultratingulli ka qenë prej kohësh një mjet që ndihmon mjekët të shohin brenda trupit, por tashmë, valët e zërit me frekuencë të lartë po përdoren për të luftuar drejtpërdrejt tumoret kancerogjene.
Zhen Xu, profesoreshë e inxhinierisë biomjekësore në Universitetin e Miçiganit në SHBA, zbuloi rastësisht një metodë revolucionare për trajtimin e kancerit të mëlçisë, të quajtur histotripsi, gjatë kohës kur ishte studente e doktoraturës. Ajo po eksperimentonte me përdorimin e valëve të fuqishme të ultratingullit për të shkatërruar indet e dëmtuara pa nevojën për kirurgji.
Për shkak se pajisja e saj bënte shumë zhurmë dhe shqetësonte kolegët, Xu vendosi të rrisë frekuencën e pulsimeve të ultratingullit për të ulur dëgjueshmërinë e zërit. Ajo nuk priste rezultate, por papritur pa se ultratingulli krijoi një vrimë në indin e zemrës së derrit brenda një minute dhe kështu lindi histotripsia.
FDA e SHBA e miratoi këtë trajtim në tetor 2023 për tumoret e mëlçisë, dhe një studim i mëvonshëm tregoi sukses teknik në 95% të rasteve. Efektet anësore si dhimbje abdominale ose gjakderdhje janë të mundshme, por komplikimet janë të rralla.
Në qershor 2024, Mbretëria e Bashkuar u bë vendi i parë në Europë që e miratoi këtë trajtim, duke e përfshirë në fazën pilot të shërbimit shëndetësor publik (NHS) për trajtime inovative për nevoja mjekësore të pambuluara.
Sipas studiueses Julie Earl nga Spanja, ultratingulli mund të bëjë shumë më tepër sesa vetëm diagnostikim, ai mund të shkatërrojë tumore, të ndalojë përhapjen e kancerit dhe të përmirësojë efektivitetin e terapive të tjera dhe e gjitha kjo pa kirurgji. /Skyweb.al
