Pagesat bankare po rriten me ritme të shpejta në Shqipëri, duke treguar një largim gradual nga përdorimi i parasë fizike.
Sipas Bankës së Shqipërisë, në tremujorin e parë të vitit 2026 individët dhe bizneset kryen mbi 16 milionë pagesa përmes sistemit bankar, 22% më shumë se një vit më parë. Vlera totale e transaksioneve arriti në 1.99 trilionë lekë, me rritje vjetore prej 18%.
Peshën kryesore e mbajnë pagesat me kartë, me rreth 10.9 milionë veprime në POS, ose 68% të totalit. Edhe numri i kartave aktive u rrit në 1.66 milionë në fund të marsit.
Në rritje janë edhe transfertat bankare, ku 67% e tyre tashmë kryhen përmes kanaleve elektronike. Ndërkohë, numri i llogarive bankare arriti në 4.16 milionë në fund të vitit 2025, mbi 710 mijë më shumë se një vit më parë.
Rritja lidhet me zgjerimin e shërbimeve bankare, përdorimin më të madh të pagesave elektronike dhe efektet e ligjit për llogaritë bazike, që synon akses më të gjerë të qytetarëve në sistemin bankar.
