Danimarka pritet të ndërmarrë hapa të mëdhenj për të mbrojtur shëndetin mendor dhe mirëqenien e fëmijëve. Kryeministrja Mette Frederiksen njoftoi të martën se qeveria e saj do të propozojë një ligj për ndalimin e përdorimit të rrjeteve sociale për fëmijët nën moshën 15 vjeç.
Duke folur në hapjen e sesionit të ri të parlamentit danez, Frederiksen tha se prindërit do të kenë gjithashtu mundësinë të miratojnë përdorimin e rrjeteve sociale për fëmijët nga mosha 13 vjeç.
“Ne kemi thënë po ndaj telefonave celularë në jetën e fëmijëve tanë në kuptimin më të mirë. Që ata të mund të telefonojnë në shtëpi dhe të komunikojnë me miqtë e tyre,” tha Frederiksen. “Por realiteti është se kemi lëshuar një përbindësh. Asnjëherë më parë nuk ka pasur kaq shumë fëmijë dhe të rinj që vuajnë nga ankthi dhe depresioni”, shtoi ajo.
Ajo theksoi gjithashtu se shumë fëmijë kanë vështirësi në lexim dhe përqendrim, dhe shpesh përballen me përmbajtje të papërshtatshme në internet.
Frederiksen përmendi edhe statistika shqetësuese, ku sipas saj, 60% e djemve të moshës 11 deri në 19 vjeç nuk takojnë fizikisht asnjë mik në kohën e lirë gjatë një jave të tërë. Edhe pse ajo nuk dha një burim të saktë për këtë shifër, ngriti pyetjen: “A mendoni se ky numër do të ishte kaq i lartë po të mos ishte për shkak të telefonit?”
“Telefonat dhe rrjetet sociale po na vjedhin fëmijërinë e fëmijëve,” përfundoi ajo.
Ky propozim vjen pas një vendimi të mëparshëm në fund të shtatorit, ku parlamenti danez votoi për ndalimin e celularëve në shkollat fillore dhe programet pas shkollës, sipas një rekomandimi të një komisioni për mirëqenie të ngritur nga Frederiksen në vitin 2023.
Danimarka është një nga disa vende që po marrin masa për të kufizuar aksesin e fëmijëve në rrjetet sociale dhe teknologji. Në nëntor të vitit të kaluar, Australia miratoi një ligj të ngjashëm, duke ndaluar rrjetet sociale për fëmijët nën 16 vjeç dhe duke kërkuar nga kompanitë teknologjike të ndërmarrin hapa të arsyeshëm për të ndaluar përdoruesit nën moshë, përndryshe përballen me gjoba deri në 50 milionë dollarë australianë (rreth 33 milionë dollarë amerikanë). /Skyweb.al
