Inspektorati Kombëtar i Mbrojtjes së Territorit ka gjobitur me 4,000,000 lekë kompaninë “Albchrome” në Elbasan dhe ka vendosur pezullimin e përkohshëm të aktivitetit të saj.
Masa është marrë pas një inspektimi të kryer në subjekt, ku sipas IKMT-së është konstatuar magazinimi i 318 tonëve mbetje të rrezikshme, të dala nga sistemi i pluhur kapësit.
Për këtë sasi mbetjesh, kompania nuk dispononte kontratë transferimi për evadimin, asgjësimin apo përpunimin e tyre, pavarësisht se bëhej fjalë për mbetje të klasifikuara si të rrezikshme.
Pezullimi i aktivitetit do të qëndrojë në fuqi deri në asgjësimin e plotë të mbetjeve dhe përmbushjen e detyrimeve ligjore për trajtimin e tyre.
Rasti ngre shqetësime mbi mënyrën e administrimit të mbetjeve industriale, sidomos në aktivitetet që prodhojnë mbetje me rrezik për mjedisin dhe shëndetin publik. /skyweb.al
