Drejtoria e Përgjithshme e Tatimeve ka njoftuar nisjen e procedurës së rimbursimit për 34,263 individë, të cilët kanë deklaruar një ose dy fëmijë në ngarkim në deklaratën individuale vjetore të të ardhurave për vitin 2025.
Sipas njoftimit të Tatimeve, përfitues janë individët që pas deklarimit në DIVA 2025 kanë rezultuar me tatim të mbipaguar.
Rimbursimi do të kryhet përmes llogarive bankare që janë deklaruar nga vetë individët përfitues.
“Nis rimbursimi për 34,263 individë që kanë deklaruar 1 ose 2 fëmijë në ngarkim në DIVA 2025 dhe kanë rezultuar me tatim të mbipaguar. Pagesat do të kalojnë në llogaritë bankare të deklaruara nga individët përfitues”, thuhet në njoftimin e Drejtorisë së Përgjithshme të Tatimeve.
Ky proces lidhet me trajtimin tatimor të individëve që kanë përfituar zbritje për fëmijët në ngarkim, në rastet kur nga përllogaritja përfundimtare ka rezultuar se gjatë vitit është paguar më shumë tatim sesa detyrimi real.
