Ministria e Infrastrukturës dhe Energjetikës i ka kërkuar zyrtarisht dy kompanive të përfshira në ndërtimin e Aeroportit të Vlorës që të zgjidhin brenda 30 ditëve mosmarrëveshjet mes tyre, në mënyrë që projekti të mos mbetet i bllokuar.
Përmes një letre të firmosur nga ministri Enea Karakaçi, Ministria i drejtohet kompanive “MABCO” dhe “2A”, duke u kujtuar se konfliktet mes ortakëve nuk mund të pengojnë vijimin e një projekti të konsideruar me rëndësi kombëtare.
Në letër theksohet se interesi publik për përfundimin e aeroportit tejkalon interesat private të ortakëve dhe të vetë koncesionarit.
“MIE kërkon formalisht përmes këtij komunikimi, që palët të iniciojnë një proces të përbashkët për zgjidhjen e mosmarrëveshjeve mes tyre, proces i cili duhet të realizohet brenda një periudhe 30 ditore nga data e këtij komunikimi”, thuhet në letrën e ministrit Karakaçi.
Ministria shprehet e gatshme të bashkëpunojë me palët për të garantuar përmbushjen e detyrimeve që rrjedhin nga kontrata koncesionare, por njëkohësisht paralajmëron se shteti mund të ndërhyjë nëse kompanitë nuk arrijnë një zgjidhje brenda afatit të vendosur.
“Në rast mosmarrëveshje brenda afatit të mësipërm të kërkesave të dërguara nga autoriteti dhe vijimit të mosmarrëveshjeve, MIE do të ushtrojë të gjitha të drejtat e parashikuara në Kontratën e Koncesionit dhe legjislacioni përkatës, në mbrojtje të interesit publik dhe interesave të shtetit shqiptar”, thuhet në fund të letrës.
Ky zhvillim vjen pak ditë pasi Gjykata e Lartë prishi vendimin që kishte pezulluar të drejtën e votës dhe të drejtat e tjera të shoqërisë “MABCO” në kompaninë “Vlora International Airport”.
Çështja ishte shqyrtuar mbi bazën e rekursit të paraqitur nga “MABCO”. Tre gjyqtarët e Gjykatës së Lartë vlerësuan të rrëzojnë kërkesën e shoqërive “Vlora International Airport” dhe “2A Group” për marrjen e masës së sigurimit ndaj “MABCO”.
Vendimi i Gjykatës së Lartë i hapi rrugë rikthimit të “MABCO” në të drejtat e saj brenda shoqërisë që administron projektin e Aeroportit të Vlorës, ndërsa ndërhyrja e Ministrisë synon të shmangë që përplasja mes ortakëve të kthehet në pengesë për përfundimin e veprës.
Aeroporti i Vlorës është një nga projektet më të rëndësishme infrastrukturore në vend dhe është prezantuar si një investim strategjik për zhvillimin e turizmit, transportit ajror dhe ekonomisë së jugut.
Por përplasjet mes kompanive të përfshira në projekt kanë krijuar pasiguri mbi ecurinë e punimeve dhe afatet e përfundimit. Skyweb.al ka shkruajtur vazhdimisht për mundësinë e ndërhyrjes së MIE-s nëse vijonte sherri mes ortakëve në VIA dhe duket se dita ka ardhur.
Me letrën e fundit, qeveria duket se po u jep palëve një afat të fundit politik dhe kontraktual për të gjetur zgjidhje mes tyre, përpara se Ministria të përdorë instrumentet që i njeh kontrata e koncesionit dhe legjislacioni në fuqi. /skyweb.al
