Këshilli Mbikëqyrës i Bankës së Shqipërisë vendosi dje të mbajë të pandryshuar normën bazë të interesit në nivelin 2.5%, në përfundim të shqyrtimit të Raportit të Politikës Monetare për tremujorin e katërt.
Vendimi vjen pas analizës së zhvillimeve të fundit ekonomike dhe financiare, të cilat tregojnë një ekonomi në rritje të qëndrueshme dhe inflacion të ulët, nën objektivin prej 3%.
Sipas Bankës së Shqipërisë, ekonomia shqiptare ka vijuar të zgjerohet, ndërsa tregjet financiare mbeten të qeta dhe kreditimi në rritje. Inflacioni ka shënuar një rritje të lehtë në tremujorin e tretë, duke arritur në 2.4%, por vijon të mbetet poshtë objektivit të bankës qendrore. Rritja është ndikuar kryesisht nga çmimet e qirave dhe shërbimeve, ndërsa çmimet e ushqimeve kanë rënë dhe kursi i këmbimit i qëndrueshëm ka ndihmuar në amortizimin e inflacionit të importuar.
Banka thekson se politika monetare e kujdesshme dhe fleksibile ka ndihmuar në ruajtjen e këtij ekuilibri, përmes koordinimit me politikën fiskale dhe kontrollit të kursit të këmbimit. Kjo qasje ka krijuar një ambient financiar të favorshëm për rritjen e konsumit, investimeve dhe kreditimit.
Sipas të dhënave të Instat, ekonomia është rritur me 3.6% gjatë gjysmës së parë të vitit, e nxitur nga konsumi familjar, investimet private dhe eksporti i shërbimeve, sidomos turizmi. Punësimi në sektorin privat u rrit me 3.4%, ndërsa paga mesatare u rrit me 9.5% dhe papunësia zbriti në 8.5%, një nivel historikisht i ulët.
Banka vlerëson se rritja e pagave nuk ka ushtruar presione të forta inflacioniste, pasi është përthithur nga rritja e produktivitetit dhe fitimet e bizneseve. Megjithatë, tregu i punës mbetet nën tension për shkak të kërkesës së lartë për punë dhe mungesës së ofertës.
Në perspektivë, inflacioni pritet të kthehet në objektivin 3% gjatë gjysmës së parë të vitit 2026, ndërsa ekonomia do të vijojë të rritet me ritme të qëndrueshme.
Në këtë kuadër, Këshilli Mbikëqyrës vendosi:
të mbajë të pandryshuar normën bazë të interesit në 2.5%;
të mbajë të pandryshuar normën e depozitës njëditore në 1.5%;
të mbajë të pandryshuar normën e kredisë njëditore në 3.5%.
Sipas njoftimit, politika aktuale monetare mbetet e përshtatshme për ruajtjen e stabilitetit të çmimeve dhe nxitjen e rritjes ekonomike. Banka e Shqipërisë sinjalizon se do të vazhdojë ta mbajë këtë qëndrim derisa inflacioni të stabilizohet plotësisht në objektiv, duke përshtatur vendimmarrjen në varësi të zhvillimeve ekonomike dhe financiare në vend dhe jashtë tij. /skyweb.al
