Një situatë e pazakontë u regjistrua në një bazë ajrore pranë Uashingtonit, ku qëndron edhe avioni presidencial i Shteteve të Bashkuara. Autoritetet njoftuan për zbulimin e një pakoje të dyshimtë, çka solli menjëherë ndërhyrjen e forcave të sigurisë dhe të njësive të specializuara për substanca të rrezikshme (Hazmat).
Sipas burimeve nga terreni, pas hapjes së pakos disa persona raportuan shqetësime shëndetësore dhe u trajtuan nga ekipet mjekësore në vendngjarje. Për arsye sigurie, ndërtesa ku u gjet pakoja u evakuua dhe zona u rrethua për të shmangur çdo rrezik të mundshëm.
Ekipet Hazmat kryen testet fillestare për të përcaktuar nëse materiali i gjetur përbënte kërcënim kimik apo biologjik, por rezultatet e para nuk treguan ndonjë rrezik të menjëhershëm. Megjithatë, autoritetet kanë nisur një hetim të plotë për të zbuluar origjinën e pakos dhe mënyrën se si ajo arriti brenda zonës së sigurisë së lartë.
Ngjarja ka ngritur sërish shqetësime mbi masat e sigurisë në bazat ushtarake amerikane dhe rrethinën e kryeqytetit, veçanërisht në hapësirat që lidhen me presidentin dhe stafin e tij./Skyweb.al
