Robotët humanoidë të Teslës, të quajtur Optimus, janë shfaqur në sallonet e ekspozimit të kompanisë, madje edhe në foto me yje si Kim Kardashian. Por vizioni i Elon Musk për këtë robot është shumë më i madh se kaq.
Që nga prezantimi i parë në vitin 2022, Musk ka thënë se Optimus mund të bëhet pjesë e jetës së përditshme të njerëzve në mbarë botën. Përveç makinave vetë-drejtuese Robotaxi dhe Cybertruck, ai beson se robotët janë çelësi për të forcuar pozicionin e Teslës në fushën e inteligjencës artificiale (AI).
Aksionarët që miratuan paketën e tij të pagës me vlerë 1 trilion dollarë duket se pajtohen me këtë vision, një nga kushtet për ta marrë këtë pagesë është që Tesla të prodhojë 1 milion robotë AI gjatë dekadës së ardhshme.
Gjigantët e teknologjisë në Silicon Valley po garojnë për të zhvilluar robotë me formë njerëzore. Një raport i Morgan Stanley parashikon se Apple mund të fitojë deri në 133 miliardë dollarë në vit nga kjo industri deri në vitin 2040. Kompania Foxconn po përdor tashmë robotë në fabrikën e saj të Nvidia në Teksas.
Kombinimi i një truri të fuqishëm AI me një trup që mund të ndërveprojë fizikisht me botën është një ide që mund të ndryshojë gjithçka. Robotë të tillë po testohen për fabrika, restorante, kujdes për të moshuarit dhe siguri, shkruan BBC.
Kompania norvegjeze 1X po përgatitet të nxjerrë në treg robotin Neo në vitin 2026, që mund të kryejë detyra shtëpiake si larja e enëve apo palosja e rrobave, megjithëse për momentin kontrollohet nga një njeri me syze virtuale (VR).
Ekspertët thonë se përmirësimet në teknologjinë e robotëve dhe ulja e kostove i bëjnë këto pajisje gjithnjë e më të mundshme. Sipas analistit Brian Hopkins, deri në vitin 2030 robotët humanoidë mund të ndikojnë ndjeshëm në shumë industri fizike.
Elon Musk ka deklaruar se robotët e tij mund të bëhen më të rëndësishëm se biznesi i makinave. Pas miratimit të paketës së tij të pagës, ai tha se Optimus mund të jetë “produkti më i madh në histori, më i madh se telefonat”.
Ai beson se roboti do të ndihmojë edhe në zhvillimin e inteligjencës artificiale të përgjithshme (AGI), sistemet që mund të arrijnë aftësi të ngjashme me ato të njeriut. /Skyweb.al
