Një rritje e konsiderueshme e fluturimeve drejt Evropës është evidentuar gjatë periudhës së pushimeve verore nga korriku deri në gusht, pavarësisht ndërprerjeve të shkaktuara nga lufta në Lindjen e Mesme, sipas të dhënave të Eurocontrol. Në vendet më të vizituara përmendet edhe Shqipëria.
Sipas organizmit evropian të sigurisë së aviacionit, Evropa regjistroi mesatarisht 35 959 fluturime në ditë, një rritje prej 2.4 për qind krahasuar me vitin 2025, ndërsa një rekord prej 37 640 fluturimesh u regjistrua të premten, më 10 korrik.
Pavarësisht rritjes në të gjithë kontinentin, 72.6 për qind e fluturimeve mbërritën në kohë, 1.2 pikë përqindjeje më shumë se në vitin 2025.
Franca mbeti vendi me numrin më të madh të vonesave të shkaktuara nga problemet në menaxhimin e trafikut ajror, duke përbërë e vetme 32 për qind të të gjitha vonesave.
Megjithëse Eurocontrol pranoi se lufta SHBA-Iran “ndikoi” në sezonin turistik të këtij viti, konflikti ka nxitur gjithashtu shumë europianë të kalojnë pushimet brenda kontinentit të tyre, i cili konsiderohet gjerësisht më i sigurt.
Cilat destinacione turistike përfituan më shumë?
Raporti i Eurocontrol tregon se konflikti ka sjellë trafik më të ulët në Bullgari, Hungari dhe Turqi, por një “rritje të lartë” drejt vendeve, përfshirë Shqipërinë, Kroacinë, Qipron, Greqinë, Malin e Zi, Maqedoninë e Veriut, Serbinë dhe Slloveninë, me “rritje të vazhdueshme në Europën jugperëndimore”.
Numri rekord i pasagjerëve në aeroportet e Greqisë e çoi sistemin e saj të kontrollit të trafikut ajror në kufijtë e kapacitetit, veçanërisht gjatë sezonit të pikut.
Katërmbëdhjetë vende regjistruan këtë verë trafikun e tyre më të lartë ditor ndonjëherë, për sa i përket mbërritjeve dhe nisjeve, përfshirë Shqipërinë, Armeninë, Gjeorgjinë, Greqinë, Irlandën, Italinë, Moldavinë, Maqedoninë e Veriut, Malin e Zi, Portugalinë, Serbinë, Sllovakinë, Spanjën dhe Turqinë.
Disa kompani ajrore dhe grupe kompanish ajrore regjistruan gjithashtu trafik rekord, përfshirë Aegean, Air Serbia, easyJet, Jet2.com, Pegasus, Royal Air Maroc, Ryanair, Sky Express, SunExpress dhe Turkish Airlines./ euronews.al
