29 marsi 2027 do të shënojë nisjen e fluturimeve dy herë në javë midis Tiranës dhe Luksemburgut, përkatësisht të hënave dhe të premteve, nëpërmjet partnerit më të ri Luxair.
Linja e re ajrore direkte forcon më tej lidhjen e kryeqytetit shqiptar me tregjet kryesore evropiane.
Ajo do t’i shërbejë kërkesave në rritje për Shqipërinë si destinacion turistik, gjjthashtu edhe nevojave të komunitetit shqiptar në Luksemburg.
Nisja e shërbimit Luksemburg–Tiranë vjen në një periudhë ku Aeroporti Ndërkombëtar i Tiranës ka përjetuar një rritje të ndjeshme të numrit të pasagjerëve dhe të rrjetit të destinacioneve vitet e fundit.
Piervittorio Farabbi, Drejtor Operacional i Aeroportit Ndërkombëtar të Tiranës, u shpreh:
“Jemi shumë të kënaqur të mirëpresim Luxair si partnerin më të ri të TIA-s dhe të hapim këtë lidhje të rëndësishme të re mes Shqipërisë dhe Luksemburgut. Nisja e kësaj linje i përgjigjet një mundësie të qartë të tregut, duke lidhur dy tregje me marrëdhënie të forta ekonomike, turistike dhe njerëzore.
Jemi të bindur se kjo linjë do të kontribuojë në potencialin turistik dhe të biznesit të Shqipërisë, ndërsa do të forcojë më tej lidhjet me komunitetin shqiptar që jeton në Luksemburg dhe në rajonin e gjerë përreth.
Falënderojmë Luxair për besimin e treguar ndaj Tiranës dhe mezi presim të ndërtojmë një partneritet të suksesshëm dhe afatgjatë.”
Me shtimin e këtij destinacioni, TIA do jetë tashmë e lidhur me 39 shtete, një numër rekord për rajonin e Ballkanit.
Fluturimet janë të disponueshme për rezervim duke filluar nga 10 shtator 2026, përmes kanaleve të shitjes së Luxair https://www.luxair.lu
Detajet e linjës:
Luksemburg (LUX) – Tiranë (TIA)
Frekuenca: Dy herë në javë
Ditët e operimit: Të hënën dhe të premten
Data e nisjes: 29 mars 2027
