Sipas një raporti të publikuar pak kohë më parë nga Shoqata Ndërkombëtare e Transportit Ajror (IATA), rreth 78% e popullsisë botërore nuk ka udhëtuar kurrë me avion. Kjo do të thotë se vetëm 22% e njerëzve kanë pasur mundësinë të përjetojnë një udhëtim ajror.
Ndryshe nga Shtetet e Bashkuara ku vetëm rreth 12% e njerëzve nuk kanë fluturuar kurrë, në rajone si Afrika dhe Azia, përqindja është shumë më e lartë. Në Afrikë rreth 88%, ndërsa në Azi afro 75% e popullsisë nuk ka hipur kurrë në një avion.
Ky hendek vjen për shkak të faktorëve të ndryshëm, si kostoja e lartë e biletave ajrore, mungesa e infrastrukturës dhe linjave ajrore të zhvilluara, si dhe barriera ekonomike e sociale që pengojnë udhëtimet ajrore për shumë njerëz.
Kjo situatë reflekton një ndarje të thellë në aksesin ndaj mundësive për të udhëtuar dhe ka pasoja të rëndësishme për zhvillimin ekonomik, arsimor dhe kulturor të komuniteteve që mbeten jashtë këtij rrjeti global lëvizjeje. /Skyweb.al
