Dy startup-e bioteknologjike amerikane po zhvillojnë terapi gjenetike që mund të lejojnë trupin të prodhojë vetë proteinat aktive të barnave si Ozempic, Wegovy, Zepbound dhe Mounjaro. Këto barna, që imitojnë hormonin GLP-1 (glucagon-like peptide-1), kanë revolucionarizuar trajtimin e obezitetit dhe diabetit duke ulur sheqerin në gjak dhe duke reduktuar ndjeshëm oreksin, shkruan CNN.
RenBio dhe Fractyl kanë testuar me sukses teknologjitë e tyre te minjtë dhe tashmë po i zgjerojnë provat në derra e majmunë. Qëllimi i tyre është që një injeksion i vetëm të shndërrojë qelizat e muskujve në “fabrika” të vogla që prodhojnë vazhdimisht proteinën GLP-1, duke e bërë të panevojshme përdorimin e përditshëm apo javor të ilaçeve ekzistuese.
Teknologjia e RenBio, e quajtur “Make Your Own”, përdor një plazmid ADN-je, një unazë e vogël ADN-je që përmban udhëzimet për ndërtimin e proteinës GLP-1. Me ndihmën e impulseve të shkurtra elektrike, ADN-ja futet në qelizat e muskujve, të cilat më pas fillojnë ta prodhojnë vetë proteinën.
Edhe pse këto rezultate janë ende në faza shumë të hershme, shkencëtarët shpresojnë se në të ardhmen kjo qasje mund të ofrojë një alternativë afatgjatë, më të lirë dhe më të qëndrueshme ndaj barnave aktuale për humbje peshe dhe kontroll të diabetit. Megjithatë, priten edhe disa vite kërkimesh për të vërtetuar sigurinë dhe efektivitetin e saj tek njerëzit. /Skyweb.al
