Banka e Shqipërisë ka paralajmëruar qeverinë për gjendjen e vështirë të skemës së sigurimeve shoqërore dhe shëndetësore, duke kërkuar masa urgjente reformuese për të shmangur një krizë të mundshme fiskale në vitet e ardhshme.
Gjatë seancës dëgjimore në Komisionin Parlamentar për Ekonominë, Punësimin dhe Financat, Zëvendësguvernatorja e Parë, Luljeta Minxhozi, deklaroi se deficiti i skemave të sigurimeve ka tejkaluar edhe nivelin e deficitit të përgjithshëm buxhetor, duke u kthyer në një barrë të madhe për financat e shtetit.
“Deficiti i skemës së sigurimeve shoqërore dhe shëndetësore vijon të jetë një barrë e konsiderueshme për buxhetin e shtetit, duke tejkaluar edhe nivelin e deficitit të përgjithshëm buxhetor,” – tha Minxhozi.
Sipas saj, plakja e popullsisë dhe tkurrja demografike janë faktorët kryesorë që po rrisin presionin mbi këto skema, duke i bërë ato të paqëndrueshme në afatin e mesëm dhe të gjatë. “Këta tregues do të ushtrojnë trysni të shtuar mbi financat publike në të ardhmen, duke bërë të domosdoshëm ndërmarrjen e reformave shtesë që do garantonin reduktimin e vulnerabiliteteve fiskale,” – paralajmëroi ajo.
Në rekomandimet e saj, Banka e Shqipërisë kërkon nga qeveria që të ndërmarrë tre hapa kryesorë:
Rishikimin e parametrave të skemës së pensioneve, për të kufizuar varësinë nga buxheti i shtetit.
Zhvillimin dhe promovimin e shtyllës së dytë dhe të tretë të pensioneve, përmes lehtësive fiskale dhe rregullave që nxisin kursimet private.
Integrimin e analizës së rreziqeve demografike dhe fiskale në planifikimin afatmesëm të buxhetit, në përputhje me praktikat më të mira të Bashkimit Europian.
Ky paralajmërim vjen në një moment kur qeveria ka shpallur nisjen e reformës së re të pensioneve nga viti 2026, ndërsa Banka e Shqipërisë thekson se pa ristrukturim të plotë, deficiti i skemës do të vazhdojë të rëndojë mbi taksapaguesit dhe stabilitetin financiar të vendit. /skyweb.al
