Sipas të dhënave më të fundit të publikuara nga Eurostat, Shqipëria ka regjistruar një normë vdekshmërie foshnjore prej rreth 5 deri në 6 vdekje për 1 000 lindje të gjalla gjatë vitit 2023, duke u renditur mbi mesataren e Bashkimit Evropian, e cila është 3.3 vdekje për 1 000 lindje.
Ky tregues, që mat numrin e vdekjeve të fëmijëve nën 1 vjeç për çdo 1 000 lindje të gjalla, tregon se Shqipëria, ndonëse ka bërë përparime në shëndetin publik dhe kujdesin neonatal, vijon të përballet me sfida që e vendosin mbi nivelin mesatar të vendeve të BE-së.
Në rajonin e Ballkanit Perëndimor, vdekshmëria foshnjore mbetet më e lartë se në vendet anëtare të BE-së.
Serbia dhe Maqedonia e Veriut kanë regjistruar norma që variojnë nga 6 deri në 8.5 vdekje për 1 000 lindje, ndërsa Bosnja dhe Hercegovina rreth 6, dhe Mali i Zi rreth 4.5, duke qenë më afër mesatares evropiane.
Në kontrast, vendet e BE-së veriore si Finlanda, Suedia, Danimarka dhe Irlanda shfaqin norma ndër më të ulëtat në kontinent, me më pak se 2.5 vdekje për 1 000 lindje, ndërsa Rumania dhe Bullgaria janë ndër vendet me vlera më të larta në Union, me 4.5 deri në 6.5 vdekje.
Turqia rezulton të ketë nivelin më të lartë të vdekshmërisë foshnjore në rajon dhe në Evropë, me mbi 8.5 vdekje për 1 000 lindje, duke treguar një kontrast të fortë me vendet perëndimore.
Këto diferenca pasqyrojnë cilësinë e shërbimeve të kujdesit shëndetësor, qasjen në trajtim prenatal dhe kushtet socio-ekonomike të vendeve.
Në rastin e Shqipërisë, përmirësimet e fundit në infrastrukturën spitalore dhe shërbimet për nënat dhe fëmijët kanë dhënë rezultate pozitive, por kërkohet ende investim më i madh në kujdesin parandalues dhe në mbështetjen e familjeve në zonat rurale./skyweb.al
