Liderët e Ballkanit Perëndimor u mblodhën sot në Tiranë në samitin “Plani i rritjes, rruga jonë në BE”, ku pas takimit Kryeministri Edi Rama dhe komisionerja për zgjerimin Marta Kos dolën në një konferencë të përbashkët për shtyp.
Rama komentoi zhvillimet e fundit në drejtësi, një ditë pas vendimit të SPAK dhe GJKKO për të vendosur masën “Ndalimi i daljes jashtë shtetit” dhe “Pezullimi nga detyra” ndaj zëvendëskryeministres Belinda Balluku. Ai e quajti situatën një rast të paprecedentë në kontinent dhe vuri theksin te pavarësia e drejtësisë si element kyç i procesit të integrimit.
Kryeministri deklaroi se lufta kundër korrupsionit ka qenë një prej arsyeve pse Shqipëria ka hapur të gjithë kapitujt e negociatave, ndërsa theksoi se vendi tashmë ndodhet në një epokë të re ku drejtësia funksionon e pavarur dhe pa ndërhyrje politike. Sipas tij, kjo pavarësi ka sjellë rezultate pozitive, por edhe dobësi të natyrshme të një pushteti të ri.
Në vijim Rama u ndal te rasti konkret, ku theksoi tre qëndrime kryesore. Së pari, se pavarësia e gjyqësorit është një arritje historike që nuk mund të cenohet. Së dyti, se pavarësisht kostove politike, shumica qeverisëse nuk do të ndërhyjë në vendimet e drejtësisë. Së treti, se pezullimi i një anëtareje të kabinetit nga një gjykatës dhe një prokuror është një praktikë e paparë në vendet e tjera të Europës Lindore pas tranzicionit.
Rama theksoi se megjithëse vendimi i GJKKO prek drejtpërdrejt pushtetin ekzekutiv, qeveria nuk do të hyjë në konflikt me drejtësinë. Ai deklaroi se vendimi do të respektohet plotësisht, ndërsa mbrojtja e pavarësisë së ekzekutivit do t’i kërkohet vetëm Gjykatës Kushtetuese.
Konferenca u zhvillua në kuadër të samitit rajonal për planin e rritjes dhe përgatitjet për integrimin ekonomik dhe institucional të Ballkanit Perëndimor me Bashkimin Europian.
