Në Shqipëri, zakonet e përdorimit të telefonisë celulare po ndryshojnë me ritme të shpejta. Sipas të dhënave më të fundit të Autoritetit të Komunikimeve Elektronike dhe Postare për tremujorin e dytë të vitit 2025, përdorimi i SMS-ve është në rënie, ndërsa trafiku i internetit dhe thirrjet celulare po rriten ndjeshëm.
Gjatë periudhës prill–qershor janë realizuar rreth 1 miliard minuta thirrje dalëse nga rrjetet celulare, një rritje e dukshme krahasuar me të kaluarën. Në të njëjtën kohë, numri i mesazheve SMS ka rënë në mënyrë të ndjeshme, duke u ulur në 98 milionë krahasuar me të njëjtën periudhë të vitit të shkuar.
Përkundrazi, trafiku i internetit në rrjetet celulare ka vazhduar ritmin e rritjes. Konsumi total ka arritur në rreth 62 milionë gigabyte, ndërsa përdorimi mesatar mujor për pajtimtar ka shkuar në 9.84 GB. Kjo rritje lidhet kryesisht me përdorimin e shtuar të aplikacioneve të komunikimit, platformave të videos dhe rrjeteve sociale, të cilat kërkojnë gjithnjë e më shumë kapacitete interneti.
Ndryshime po vërehen edhe në tregun e kartave SIM. Në fund të tremujorit të dytë, qarkullonin rreth 3.27 milion karta SIM, ndërsa numri i përdoruesve aktiv ishte 2.42 milion. Të dy shifrat kanë rënë krahasuar me një vit më parë, duke sinjalizuar një konsolidim të tregut dhe një orientim drejt përdorimit më efikas të pajisjeve dhe paketave celulare.
Këto zhvillime pasqyrojnë përparimin teknologjik dhe ndryshimet në mënyrën se si qytetarët zgjedhin të komunikojnë, duke preferuar gjithnjë e më shumë internetin për shkëmbimin e informacionit. Në këtë situatë, operatorët celularë pritet të fokusohen në përmirësimin e cilësisë së internetit dhe në krijimin e paketave që i përgjigjen nevojave gjithnjë e më digjitale të përdoruesve./Skyweb.al
