Përhapja e shpejtë e inteligjencës artificiale në sektorin financiar po detyron autoritetet europiane të mendojnë rregulla të reja për të kufizuar rreziqet.
Shqetësimi kryesor lidhet me përdorimin e sistemeve që mund të marrin vendime vetë, pa ndërhyrje të vazhdueshme njerëzore.
Këto modele mund të përdoren në transaksione financiare, analiza tregu, vendime investimi apo kontroll të riskut.
Por rregullatorët paralajmërojnë se teknologjia po ecën më shpejt se ligjet dhe mjetet tradicionale të mbikëqyrjes.
Kreu i Autoritetit britanik të Mbikëqyrjes Financiare, Nikhil Rathi, ka thënë se autoritetet duhet të gjejnë mënyra të reja për të kontrolluar rreziqet që lidhen me krimin financiar, abuzimin e tregut dhe besueshmërinë e sistemit.
Edhe presidentja e Bankës Qendrore Europiane, Christine Lagarde, ka pranuar se inteligjenca artificiale mund të ndihmojë ekonominë dhe produktivitetin, por sjell edhe rreziqe që nuk mund të injorohen.
Sipas saj, pas viteve të fokusuara te sulmet kibernetike dhe mbrojtja e të dhënave, përdorimi i shpejtë i AI krijon sfida edhe më të ndërlikuara.
Një nga shqetësimet më të mëdha është përdorimi i inteligjencës artificiale në tregjet financiare.
Zëvendësguvernatorja e Bankës së Anglisë, Sarah Breeden, paralajmëroi se në periudha tensioni këto sisteme mund të rrisin luhatjet dhe panikun në tregje.
Për këtë arsye po diskutohet krijimi i mekanizmave të sigurisë, të ngjashëm me “butona ndalimi”, që do të bllokonin përkohësisht transaksionet nëse një model i gabuar shkakton tronditje të forta.
Europa kërkon të gjejë një ekuilibër të vështirë: të mos frenojë inovacionin, por njëkohësisht të mbrojë stabilitetin financiar.
Zyrtarët europianë theksojnë se kontinenti duhet të zhvillojë edhe kapacitetet e veta teknologjike, pasi gara për inteligjencën artificiale është kthyer në çështje ekonomike dhe gjeopolitike.
