Të ardhurat nga tatimi mbi të ardhurat personale shënuan një tjetër rekord këtë Tetor, duke arritur në 6.3 miliardë lekë, ose 65 milionë euro që qytetarët shqiptarë kanë paguar për të ardhurat e krijuara. Kjo është shifra më e lartë e regjistruar në një muaj Tetor gjatë dekadës së fundit.
Krahasuar me Tetorin 2015, kur arkëtimi ishte rreth 25 milionë euro, të ardhurat janë trefishuar, duke konfirmuar rritjen e bazës së tatueshme dhe formalizimit.
Për periudhën Janar–Tetor 2025, të ardhurat nga TAP kapën vlerën 69.6 miliardë lekë (rreth 720 milionë euro), me një rritje 25% ndaj të njëjtës periudhë të vitit 2024. Edhe në 10-mujor, niveli i arkëtimeve është më i larti i kësaj dekade.
Sipas administratës tatimore, performanca është ndikuar nga:
• Rritja e sigurimeve shoqërore dhe shëndetësore, që reflekton deklarim më të saktë nga bizneset.
• Fushata antiinformalitet, e cila në fazën e parë bëri që mbi 9 mijë biznese të rrisnin pagat e deklaruara.
• Vendosja e pagave të referencës në turizëm, që rriti ndjeshëm deklarimin e pagave në këtë sektor gjatë sezonit.
• Rritja e pagave në administratë, ku paga mesatare kaloi 900 euro, duke shtuar edhe tatimin e paguar.
Të ardhurat nga tatimi mbi të ardhurat personale përfshijnë edhe qiratë dhe interesat, por pjesa dërrmuese vjen nga pagat.
Me rritjen e pagës minimale në 500 mijë lekë dhe hyrjen në fuqi të skemës së indeksimit me 2.5% në disa sektorë gjatë vitit të ardhshëm, pritet që të ardhurat tatimore nga TAP të vazhdojnë rritjen edhe në 2026. /skyweb.al
