Oxford University Press (OUP) ka shpallur “rage bait” si fjalën e vitit 2025, sipas BBC. Ky term i referohet përmbajtjeve online të krijuara qëllimisht për të nxitur zemërim ose irritim tek përdoruesit, shpesh përmes komenteve provokuese, ofenduese ose frustruese.
Sipas OUP, përdorimi i këtij termi është trefishuar gjatë vitit të fundit. “Rage bait” ka ngjashmëri me “clickbait”, por ndërsa clickbait synon të tërheqë klikime përmes kuriozitetit, rage bait e bën këtë duke shfrytëzuar reagimet emocionale, sidomos zemërimin, me qëllim rritjen e trafikut online.
Dy termat e tjerë të nominuar për fjalën e vitit ishin “aura farming” dhe “biohack”. “Aura farming” i referohet krijimit të një imazhi karizmatik apo të besueshëm përmes qëndrimit ose sjelljes, ndërsa “biohack” përfshin praktika për të përmirësuar performancën fizike, mendore dhe mirëqenien përmes ndryshimeve në stilin e jetesës, teknologjisë apo suplementeve.
Sipas Oxford Languages, rritja e përdorimit të termit “rage bait” tregon një ndërgjegjësim më të madh të njerëzve për taktikat manipuluese në internet dhe ndikimin e tyre mbi emocionet tona. Kjo shënon një zhvendosje të kulturës online drejt ndikimit emocional dhe mënyrës se si përdoruesit ndërveprojnë me përmbajtjen dixhitale.
Fjala e vitit të kaluar ishte “brain rot”, që lidhej me lodhjen mendore nga shfletimi i vazhdueshëm në rrjetet sociale si Instagram dhe TikTok. Ndër fjalët e mëparshme të zgjedhura nga Oksfordi janë “selfie”, “goblin mode” dhe “rizz”.
Ndërkohë, Cambridge Dictionary ka përzgjedhur si fjalë të vitit 2025 termin “parasocial”, i cili përshkruan një lloj marrëdhënieje emocionale që një individ krijon me një person të famshëm pa e njohur atë realisht. “Collins Dictionary” ka zgjedhur “vibe coding”, që nënkupton krijimin e aplikacioneve apo faqeve duke i udhëzuar ato përmes inteligjencës artificiale, pa kodim tradicional.
Këto zgjedhje pasqyrojnë trendet e vitit 2025 dhe rolin e emocioneve në mënyrën se si njerëzit konsumojnë dhe ndërveprojnë me përmbajtjen online./skyweb.al
