Bashkimi Evropian ka arritur një marrëveshje historike për të ndërprerë plotësisht importet e gazit rus deri në vitin 2027, si pjesë e përpjekjeve për të çuar në zero varësinë energjetike nga Rusia.
Lajmi u konfirmua nga Brukseli, ku Këshilli Evropian dhe Parlamenti Evropian finalizuan një marrëveshje të përkohshme që parashikon një ndalim gradual të furnizimeve me gaz natyror të lëngshëm dhe gaz përmes tubacioneve. Presidentja e Komisionit Evropian, Ursula von der Leyen, e cilësoi këtë si një moment historik për unionin.
“Është me të vërtetë një ditë historike për unionin tonë. Arritëm një marrëveshje të përkohshme mbi propozimin e Komisionit për të hequr plotësisht dorë nga lëndët djegëse fosile ruse. Po e mbyllim atë kapitull dhe po e mbyllim përgjithmonë. Ky është agimi i një epoke të re, epoka e pavarësisë së plotë energjetike të Europës nga Rusia. Shumë besonin se kjo do të ishte e pamundur, por shifrat flasin vetë,” deklaroi von der Leyen.
Sipas marrëveshjes, importet nga Rusia do të ndalohen plotësisht deri në fund të vitit 2026, ndërsa furnizimet me gaz përmes tubacioneve do të ndërpriten deri në vjeshtën e vitit 2027.
Aktualisht, Rusia përbën rreth 12% të importeve të gazit në BE, një rënie e madhe krahasuar me 45% të para pushtimit të Ukrainës në vitin 2022. Ndër vendet që ende furnizohen me gaz rus janë Hungaria, Franca dhe Belgjika.
