Motorë, kamionë, furgona, makina luksoze dhe…anije! Të gjitha këto janë pjesë e mjeteve që janë sekuestruar nga Agjencia për Administrimin e Pasurive të Sekuestruara dhe të Konfiskuara me vendim të Gjykatës së Posaçme kundër Korrupsionit dhe Krimit të Organizuar. Në 2 katalogët e fundit që ka publikuar AAPSK, mbi 160 faqe kanë foto dhe pamje të mjeteve të sekuestrura, krahas me vlerën e mjeteve. Sipas tyre, katalogu i automjeteve të sekuestruara dhe të konfiskuara përfaqëson një informacion të përgjithshëm mbi pasuritë që ndodhen aktualisht nën administrimin e Agjencisë së Administrimit të Pasurive të Sekuestruara dhe të Konfiskuara (AAPSK).
“Ky katalog ka për qëllim transparencën dhe informimin institucional, por nuk përfaqëson një listë të automjeteve të publikuara për shitje. Proçesi i shitjes zhvillohet vetëm nëpërmjet procedurave të miratuara ligjërisht dhe me njoftim të veçantë,”-shkruhet në katalogët e publikuar nga AAPSK.
LISTA E MJETEVE LUKS TË SEKUESTRUARA:
Por cilat janë mjetet që bien më shumë në sy nga koleksioni?
Në katalog është mjeti “Phantom”, i pronarit të televizionit “Ora”, Ylli Ndroqi. Po ashtu, pjesë e koleksionit është edhe furgoni me mbishkrimin “Drejtoria e Përgjithshme e Tatimeve”, mjet që u përdor gjatë grabitjes së Rinasit. Në Elbasan është sekuestruar mjeti tip “Lamborghini” i Arjan Kamanit; ndërsa po ashtu, e ankoruar për llogari të AAPSK-së është edhe anija naftëmbajtëse “Queen Majeda”. Madje një skaf ka edhe një dedikim mbi të, ku shkruhet: Nana jem!
Por kjo nuk është hera e parë që AAPSK publikon pasuritë e sekuestruara. Pak javë më parë dolën pamjet e banesave, ndërtesave, tokave dhe garazheve, po ashtu të sekuestruara me urdhër të Gjykatës së Posaçme./ZËRI
