Një kompani amerikane minerare po përgatitet të hyjë në tregun e Republikës Demokratike të Kongos, një nga vendet më të pasura në botë me minerale strategjike, pavarësisht konflikteve të vazhdueshme dhe pasigurisë politike. Shefi i kompanisë KoBold Metals, Josh Goldman, konfirmon interesin për investime në Kongo, ku ndodhet një nga depozitat më të mëdha të njohura të litiumit, së bashku me rezerva të konsiderueshme kobalti dhe bakri.
Prej vitesh, kompanitë amerikane kanë shmangur Kongon për shkak të konflikteve të armatosura, korrupsionit dhe rrezikut të lartë për investimet. Në të kundërt, kompani kineze kanë operuar gjerësisht në këtë vend, duke siguruar pozicione dominuese në sektorin minerar.
Kjo qasje pritet të ndryshojë pas marrëveshjeve të nënshkruara më 4 dhjetor nga presidenti amerikan Donald Trump me Republika Demokratike e Kongos dhe Rwanda. Marrëveshjet, të njohura si “Washington Accords”, parashikojnë përfshirjen e Shteteve të Bashkuara në mbikëqyrjen e një procesi paqeje në rajon, ku Ruanda mbështet rebelët e M23kundër qeverisë kongoleze.
Në këmbim të angazhimit amerikan për stabilizimin e situatës së sigurisë, Kongoja është zotuar të lehtësojë investimet e kompanive amerikane në sektorin minerar, duke hapur aksesin në disa nga mineralet më të kërkuara në botë për industrinë e baterive dhe teknologjisë së avancuar.
Zhvillimi shënon një ndryshim të rëndësishëm në politikën amerikane ndaj Afrikës Qendrore dhe sinjalizon përshkallëzimin e konkurrencës gjeoekonomike me Kinën për kontrollin e burimeve natyrore kritike.
