Në Prokurorinë e Posaçme, sot në orën 10:00, zhvillohet ceremonia zyrtare e kalimit të detyrës së drejtuesit të SPAK, nga Altin Dumani te kryetari i ri Klodian Braho, i zgjedhur me 7 vota nga anëtarët e Këshilli i Lartë i Prokurorisë.
Struktura e Posaçme kundër Korrupsionit dhe Krimit të Organizuar e konsideron këtë proces si një moment të rëndësishëm për garantimin e vazhdimësisë institucionale dhe forcimin e mëtejshëm të punës së SPAK në luftën kundër korrupsionit dhe krimit të organizuar.
Sipas ligjit, drejtuesi i SPAK ka një mandat 3-vjeçar, pa të drejtë rizgjedhjeje. Altin Dumani, i cili mori drejtimin e institucionit pas Arben Kraja, drejtuesit të parë të SPAK, përfundon kështu mandatin e tij në krye të institucionit.
Pas përfundimit të detyrës si kryetar, Dumani do të vijojë punën si prokuror pranë SPAK deri në vitin 2028, kur i përfundon mandati i tij 9-vjeçar si prokuror i posaçëm.
Mandati i Dumanit në krye të SPAK është shoqëruar nga diskutime dhe kërkesa të përsëritura për ndryshime ligjore, me qëllim lejimin e rikandidimit të drejtuesve të SPAK. Megjithatë, këto kërkesa nuk u reflektuan në kuadrin ligjor, duke bërë që rotacioni në drejtimin e institucionit të zhvillohet sipas parashikimeve aktuale të ligjit./skyweb.al
