Në qershor 2025 do të hyjë në fuqi marrëveshja për njohjen reciproke të periudhave të sigurimeve shoqërore mes Shqipërisë dhe Italisë, duke i dhënë mundësi qytetarëve të dy vendeve të përfitojnë pension në bazë të kontributeve të derdhura në të dy sistemet.
Firmosja e marrëveshjes administrative në Romë nga zëvendësministrja shqiptare e Ekonomisë, Kulturës dhe Inovacionit, Olta Manjani, dhe Ministrja italiane e Punës dhe Politikave Sociale, Marina Calderone, i hap rrugë zbatimit të marrëveshjes kuadër dhe konkretizimit të përfitimeve për qytetarët.
Në vitin e parë të zbatimit, kjo marrëveshje pritet të përfshijë 1387 qytetarë shqiptarë, duke krijuar një efekt buxhetor prej 12 milionë euro për Italinë. Në total, numri i përfituesve deri në vitin 2025 pritet të arrijë në 6114 persona, nga 4727 që parashikohej para marrëveshjes. Kjo rritje përkthehet në një kosto totale prej 51.6 milionë euro për buxhetin italian, krahasuar me 39.6 milionë euro që ishte më parë.
Të dhënat zyrtare flasin për rreth 433 mijë shqiptarë që deri në vitin 2020 kanë paguar sigurime shoqërore në Itali. Marrëveshja përfshin edhe qytetarët që trajtohen me ligjin nr. 189 të vitit 2002, i cili parashikon përfitimin e pensionit për emigrantët shqiptarë të rikthyer në atdhe.
Aplikimi për pension sipas marrëveshjes do të bëhet pranë institutit të sigurimeve përkatës – ISSH në Shqipëri apo INPS në Itali – duke mundësuar që qytetarët të përfitojnë dy pensione në përputhje me vitet e kontributeve në secilin vend. Skema përfshin pensionet e pleqërisë, sigurimet për sëmundje, papunësi, invaliditet, si dhe trajtimet për vetëpunësuarit – përfshirë artizanët, tregtarët dhe fermerët.
Marrëveshja është konsideruar si një ditë historike për emigrantët shqiptarë, të cilët prej vitesh kanë kërkuar njohjen e kontributeve të tyre në sistemin italian të sigurimeve. Ajo është botuar tashmë edhe në Fletoren Zyrtare të Italisë, duke shënuar një hap konkret drejt drejtësisë sociale për mijëra shqiptarë që kanë jetuar dhe punuar në vendin fqinj./skyweb.al
