Në një vendim të papritur dhe të rëndësishëm në prag të zgjedhjeve parlamentare të 11 majit, qeveria ka miratuar një falje masive për gjobat e papaguara deri tani, një lëvizje që pritet të prekë mijëra individë dhe subjekte në të gjithë vendin. Vendimi i qeverisë parashikon shfuqizimin e masave administrative të vendosura gjatë një periudhe 10-vjeçare, nga janari 2015 deri në nëntor 2024, por që kanë mbetur të paekzekutuara deri më 15 janar 2025.
Në thelb, kjo falje prek një gamë të gjerë institucionesh dhe gjobash të vendosura nga strukturat e administratës dhe forcave të rendit.
Çfarë parashikon vendimi?
Gjobat e falura janë ato të vendosura nga:
Inspektoratet vendore të mbrojtjes së territorit
Inspektorati Kombëtar i Mbrojtjes së Territorit (IKMT)
Autoriteti Kombëtar i Ushqimit (AKU)
Inspektorati Shtetëror Shëndetësor
Policia e Shtetit
Policia Bashkiake
Gjobat që fshihen janë ato të paekzekutuara deri më 15 janar 2025, të vendosura nga 1 janari 2015 deri më 30 nëntor 2024.
Subjektet që përfitojnë nga falja janë individët dhe bizneset që:
Kanë bërë ndërtime pa leje për qëllime banimi ose për aktivitete bujqësore dhe blegtorale.
Merren me prodhimin, ruajtjen dhe tregtimin e produkteve bujqësore në zonat rurale.
Janë gjobitur për mosrespektim të masave të pandemisë Covid-19.
Si do të zbatohet procesi?
Inspektoratet vendore dhe Policia Bashkiake do të përgatisin brenda 30 ditësh listat e subjekteve përfituese.
Njësitë e vetëqeverisjes vendore do të heqin gjobat nga sistemet përkatëse të taksave dhe tarifave.
Individët dhe subjektet që konstatojnë se gjobat nuk janë hequr, mund të paraqesin kërkesë për fshirje brenda afateve të përcaktuara.
IKMT, AKU, Inspektorati Shëndetësor dhe Policia e Shtetit do të ndjekin procedura të ngjashme për fshirjen e masave administrative të vendosura nga këto institucione.
Çfarë duhet të dinë qytetarët?
Procesi i fshirjes duhet të përfundojë brenda 60 ditëve nga hyrja në fuqi e vendimit.
Në rastet më të ndërlikuara të dokumentacionit të munguar ose të pasaktë (sidomos për ndërtime pa leje), mund të kërkohet ekspertizë shtesë nga komisione të posaçme ose ekspertë të licencuar.
Nëse kërkesa për heqje të gjobës refuzohet, qytetarët dhe subjektet kanë të drejtë ankimi në gjykatë.
Ky vendim i qeverisë vjen vetëm dy ditë përpara votimeve të 11 majit dhe është konsideruar si një manovër elektorale për të zbutur pakënaqësinë sociale dhe për të rritur përkrahjen elektorale ndaj maxhorancës në segmentet më të goditura nga masat administrative të viteve të fundit. /skyweb.al
