Policia njoftoi sot paradite se ka arrestuar inxhinierin e kompanisë Nova Construction Dario Hoxha dhe shpalli në kërkim administratorin Enea Kaçi pas konstatimit të mungesës së sigurisë në punë, që dyshohet se shkaktoi vdekjen e punëtorit dje në Tiranë
Dario Hoxha dhe shpall në kërkim administratorin e Nova Construction Enea Kaçi
Një ngjarje e rëndë ndodhi më 31 maj në rrugën “Brigada VIII” në Tiranë, ku një punëtor ndërtimi, shtetas nga Bosnje-Hercegovina, humbi jetën pasi ra nga lartësia e një pallati në ndërtim. Viktima, rreth 47 vjeç, ishte i punësuar në një firmë ndërtimi që aktualisht po hetohet për shkelje të rënda të rregullave të sigurisë në punë.
Pas verifikimeve të para nga policia dhe prokuroria, është arrestuar inxhinieri i firmës “Nova Construction”, Dario Hoxha, 32 vjeç, ndërsa janë shpallur në kërkim administratorit i firmës, Enea Kaçi, 34 vjeç, dhe drejtuesi teknik, Rasim Jata, 75 vjeç, raporton Replika.al. Dyshohet se këta persona kanë lejuar punën në kushte të pasigurta, duke mos respektuar detyrimet ligjore për mbrojtjen e jetës së punonjësve në kantier.
Grupi hetimor ndodhet në vendngjarje dhe ka nisur hetimet për sqarimin e plotë të rrethanave. Sipas burimeve të policisë, po punohet për kapjen e dy shtetasve të shpallur në kërkim dhe për ndjekjen penale të të gjithë përgjegjësve.
Kjo nuk është një ngjarje e izoluar. Çdo vit, shumë punëtorë ndërtimi në Shqipëri humbin jetën ose pësojnë dëmtime të rënda për shkak të mungesës së masave të sigurisë. Shumë prej tyre punojnë pa kontrata të rregullta, pa siguracione shëndetësore dhe pa pajisje mbrojtëse. Të dhënat e Inspektoratit Shtetëror të Punës flasin për një numër të lartë shkeljesh në sektorin e ndërtimit, por ndjekja penale e përgjegjësve mbetet e rrallë dhe shpesh joefektive.
Në shumicën e rasteve, firmat ndërtuese nuk ndjekin protokollet e detyrueshme për skemimin e rrezikut, trajnimet për punëtorët, vendosjen e rrjetave mbrojtëse apo sistemet e frenimit të rënies nga lartësia. Mungesa e kontrollit të rregullt nga institucionet shtetërore dhe kapacitetet e kufizuara të inspektimit kanë bërë që këto shkelje të bëhen normë dhe jo përjashtim.
Sektori i ndërtimit në Shqipëri ka përjetuar një bum të jashtëzakonshëm në dekadën e fundit, por ky zhvillim nuk është shoqëruar me rritje të standardeve të sigurisë. Përkundrazi, rritja e vrullshme e lejeve të ndërtimit në qytetet kryesore ka bërë që kontrolli mbi cilësinë dhe sigurinë të jetë i fragmentuar dhe shpesh formalisht i kryer. /skyweb.al
