Vetëm pak muaj pas operacionit të bujshëm anti-korrupsion në Sarandë, që përfshiu arrestimin e disa zyrtarëve lokalë dhe shpalljen në kërkim të drejtuesve të ish-ALUIZNI-t dhe ASHK-së, gjithçka është zhdukur nga vëmendja publike.
Personat e përfshirë në hetim janë rikthyer në jetën normale, disa nëpër pushime luksoze dhe të tjerë duke promovuar hotele të ndërtuara në mënyrë të paligjshme. Asnjë dënim, asnjë arrestim real. Saranda, qyteti që ka parë ngritjen e dhjetëra objekteve buzë detit pa leje, vijon të heshtë ndërkohë që ligji nuk arrin më përtej letrës.
Kreu i ALUIZNI në Sarandë, Mariel Murati ngre hotel pa leje
Në qendër të skandalit që shpërtheu në prill 2024 është ndërtimi i një hoteli 7-katësh Yacht Premium pa leje ndërtimi fare pranë vijës bregdetare, i cili më pas është legalizuar me dokumente të falsifikuara.
Sipas Prokurorisë së Sarandës dhe një raporti të Kontrollit të Lartë të Shtetit (KLSH), ky ndërtim u lejua dhe më pas u “pastrua” nga zyrtarë të bashkisë dhe të strukturave rajonale të ASHK-së dhe IKMT-së nëpërmjet shkeljes së hapur të ligjit. Gjithçka u bë përmes falsifikimeve sipas autoriteteve shtetërore.
Prokuroria konfirmoi se janë ndjekur penalisht për “falsifikim dokumentesh”, “ndërtim të paligjshëm” dhe “shpërdorim detyre” disa funksionarë shtetërorë, përfshirë edhe ish-kreun e ALUIZNI-t në Sarandë, Mariel Murati, si dhe ish-drejtuesit e ASHK-së lokale, Andri Dhima dhe Kozeta Statha. Kjo e fundit është bashkëshortja e kryebashkiakut të Patosit, Fation Duro.
Liria pas “breshërisë” së prangave
Disa muaj pas operacionit, asnjë nga personat nën hetim nuk ndodhet më në paraburgim e aq më pak të jetë gjykuar siç e kërkon ligji. Madje, sipas verifikimeve në terren dhe në rrjetet sociale, Mariel Murati, i cili bëri vetëm 26 ditë burg, tani ndodhet i lirë, duke reklamuar në rrjet hotelin e tij luksoz “Yacht Premium Hotel”, që sipas aktit të legalizimit dhe verifikimeve të KLSH-së, është ndërtuar pa leje dhe ka shkaktuar dëm buxhetor prej mbi 50 milionë lekësh.
Madje, duket sikur Marial Murati e priste operacionin pasi vetëm pak ditë para se të ndërhynte prokuroria, ai ia kaloi ortakut të tij Hervion Çuçi pjesën e tij të aksioneve në kompaninë tjetër H&M Sarandë. Kjo e fundit ka bërë një xhiro rreth 180 milionë lekë gjatë 2024.
Raporti i KLSH-së, i dërguar në ASHK Sarandë më 31 korrik 2023, dokumenton se Murati ka përfituar certifikatë pronësie për një objekt të zgjeruar me kate shtesë mbi bazën e një legalizimi të dyshimtë dhe pa përllogaritje të vlerës reale të truallit shtetëror.
Rekomandimi i KLSH ishte i qartë: vendosje e “kufizimit të përkohshëm” mbi pasurinë e tij dhe detyrimi për pagesë. Por asnjë nga këto nuk është zbatuar në praktikë.
Vetëm show show show
Ndërsa prokuroria deklaron se vijonin hetimet për personat përgjegjës, realiteti në terren është ndryshe: të arrestuarit janë të lirë, të shpallurit në kërkim ishin të pakapshëm deri sa u dorëzuan vetë, si rasti i z.Murati, kurse të tjerët vijojnë biznesin dhe plazhin sipas terezisë.
Ky është rasti që SPAK dhe ILD duhet të nde4rhyjjnë për të verifikuar procedurat se si dolën të gjithë të lirë personat që u shpallën me bujë të arrestuar apo u prangosën!
Saranda duket se është kthyer në një zonë ku ndërtohet pa leje, legalizohet përmes lidhjeve me zyrtarë të korruptuar dhe pastaj “skandali” mbyllet si çdo sezon plazhi: me zhurmë në fillim dhe qetësi absolute më pas.
Dosja e Sarandës është më shumë se një çështje ndërtimi pa leje të një hoteli si Yacht Premium. Ajo është një sinjal alarmi për degradimin e zbatimit të ligjit, për dështimin e institucioneve të drejtësisë dhe për kthimin e detyrave publike në burim fitimi për individë me lidhje politike apo institucionale. Dhe ndërkohë që qytetarët përballen me procedura të ndërlikuara për një leje ndërtimi apo një legalizim të ndershëm, madje futen në burg për një kotec pulash, një hotel pa leje ngrihet, legalizohet, dhe… mirëpret turistët.
