Pas një serie anulimesh, shtyrjesh dhe kontestimesh që përfshinë tenderin për transkriptimin me inteligjencë artificiale të seancave parlamentare dhe mbledhjeve të komisioneve, Kuvendi i Shqipërisë shpalli fituesin e kontratës me vlerë rreth 750 mijë euro.
Por vetëm 48 orë pas kësaj shpalljeje, tenderi është sërish nën shqyrtim për shkak të një ankese të paraqitur pranë Komisionit të Prokurimit Publik, raporton skyweb.al.
MC Networking ka depozituar një tjetër ankesë duke kërkuar anulimin e vendimit për shpalljen e fituesit.
Në dokumentin e dorëzuar, kompania pretendon se Komisioni i Vlerësimit të Ofertave ka marrë vendimin për fituesin pa pasur në dispozicion dokumentacionin e kërkuar sipas kritereve teknike të tenderit.
Madje, kompania thekson se fituesi është shpallur në kundërshtim të kritereve të caktuara, siç është xhiroja dyfisj për shërbime të ngjashme apo certifikimi i punonjësve.
Fituesi i shpallur është operatori ekonomik “Dega Semos AL”, me mbështetjen e kompanive “PC Store” dhe “BitGenius”, për furnizimin dhe mirëmbajtjen për 48 muaj të një sistemi të automatizuar transkriptimi bazuar në inteligjencë artificiale.
Qëllimi i këtij sistemi është të lehtësojë procesin e dokumentimit të fjalimeve të deputetëve në seanca plenare, komisione dhe aktivitete të tjera parlamentare, duke garantuar transparencë dhe efikasitet institucional, por duket se procedura është kthyer në një sagë të vërtetë pas akuzave të forta për favorizim të operatorit ekonomik fitues dhe skualifikimit të të tjerëve përmes artificave.
Sipas dokumenteve të Kuvendit, përdorimi i teknologjisë së inteligjencës artificiale do të shkurtojë ndjeshëm kohën e nevojshme për zbardhjen manuale të fjalimeve dhe përgatitjen e procesverbaleve, një proces që deri më tani kërkonte shumë burime njerëzore dhe kohë.
Megjithatë, ankesa e MC Networking hedh dyshime mbi besueshmërinë dhe ligjshmërinë e procedurës, duke rikthyer në vëmendje shqetësimet për mungesë transparence dhe garë të pabarabartë.
Nëse pretendimet për mospërputhje me kriteret teknike vërtetohen, tenderi mund të përballet me një tjetër anulim dhe të çojë në hetim administrativ për mënyrën si është menaxhuar procesi.
Pritet që çështja të merret sërish në shqyrtim nga KPP, e cila do të dalë me një vendim gjatë ditëve në vijim.
Deri atëhere, deputetët do të vijojnë të zbardhen manualisht nga punonjësit e Kuvendit, edhe pse gjatë korrikut nuk pritet të ketë fjalime të qenësishme pasi të gjithë janë të përgatitur për pushime pas fushatës së ethshme zgjedhore. /skyweb.al
