Ekonomia e vendit ka shfaqur shenja ngadalësimi në tremujorin e parë të këtij viti, e ndikuar nga tkurrja e industrisë dhe bujqësisë, ndërsa dhe ndërtimi, që ishte kontribuuesi kryesor i rritjes vitet e fundit ka shfaqur shenja ngadalësimi.
Në kontrast e ndërtimin, shitja e pasurive të paluajtshme është përmirësuar.
Nuk ka dhënë efekt as turizmi, teksa aktiviteti i tregtisë ka qenë i dobët. Sektori që ka mbajtur në këmbë ekonominë në muajt e parë të këtij viti ka qenë “Administrim publik, Arsimi, Shëndetësia”, i ndikur nga rritja e pagave në administratën publike.
INSTAT raportoi se Produkti i Brendshëm Bruto (PBB), në terma reale, në tremujorin e parë të vitit 2025 vlerësohet me rritje 3,39%, në krahasim me tremujorin e parë të vitit 2024. Një vit më parë rritja kishte qenë 3.75%. ritmet e rritjes në tremujorin e parë 2025 janë më të ulëtat që nga fundi i vitit 2023.
Sektori kryesor që ka ndikuar në rritjen ekonomike është “Administrata publike, Arsimi dhe Shëndetësia” me +2,24 pikë përqindje, duke sjelle 66% të vlerës së shtuar në ekonomi.
Për Administratën publike, Arsimin dhe Shëndetësinë Pagat dhe kontributet sociale të punonjësve zënë pjesën kryesore të kontributit në PBB. Elementë të tjerë janë Shpenzimet për mallra dhe shërbime (konsumi ndërmjetës, si energji, furnizime, materiale shkollore apo mjekësore; Amortizimi i pajisjeve, godinave etj, llogaritet si pjesë e vlerës së shtuar.
Në fund të tremujorit të parë 2025, paga mesatare bruto në administratën publike ishte 98.5 mijë lek, me një rritje prej rreth 17% me bazë vjetore.
Sektori i dytë janë “Aktivitetet e pasurive të paluajtshme” me +0,43 pikë përqindje.
Pavarësisht se vendi është kthyer në një destinacion turistik, kontributi i “Tregti, Transport, Akomodim dhe Shërbim ushqimor” ishte +0,33 pikë përqindje.
“Ndërtimi”, që ka qenë motori kryesor në ekonomi në vitet e fundit kishte një kontribut modest me me +0,16 pikë përqindje.
“Arte, argëtim dhe çlodhje; aktivitete të tjera shërbimi” kontribuuan me +0,10 pikë përqindje, “Aktivitete Financiare dhe të Sigurimit” me +0,06 pikë përqindje, “Aktivitete profesionale dhe Shërbime administrative” me +0,02 pikë përqindje.
Aktiviteti “Industri, Energji dhe Uji” prej 6 tremujorëve është në territor negativ. Në tre muajt e parë kontribuoi me -0,66 pikë përqindje.
E njëjta tendencë është dhe për bujqësinë, me sektorin “Bujqësi, Pyje dhe Peshkim” që kontribuoi negativisht me -0,46 pikë përqindje.
Kontribut negativ dha dhe “Informacioni dhe Komunikacioni” me -0,07 pikë përqindje.
“Taksat Neto mbi produktet” kontribuuan pozitivisht me +1,24 pikë përqindje.
Rritja
“Administratra Publike, Arsimi dhe Shëndetësia” shënoi rritje prej 18,92%, i ndjekur nga aktiviteti i “Pasuri të Paluajtshme” me një rritje prej 8,03%.
Grupi i aktiviteteve “Arte, argëtim dhe çlodhje dhe aktivitete të tjera shërbimi” shënoi rritje prej 5,06%, grupi “Aktivitete Financiare dhe të Sigurimit” shënoi një rritje prej 3,31%.
Grupi “Tregti, Transport, Akomodim dhe Shërbim ushqimor” shënoi një rritje prej 2,12%, aktiviteti i “Ndërtimit” shënoi një rritje prej 1,78%, dhe grupi “Aktivitete profesionale dhe Shërbime administrative” shënoi rritje me 0,24%.
Grupi i aktiviteteve “Industri, Energji dhe Ujë” shënuan rënie prej 5,66%, “Informacioni dhe Komunikacioni” shënoi një rënie prej 2,93% dhe “Bujqësi, Pyje dhe Peshkim” u ul me 2,76%. Taksat Neto mbi produktet u rritën me 9,08%.
Burimi: INSTAT
/Marrë nga Monitor
