Gjykata e Lartë ka vendosur sot të mos pranojë rekursin e paraqitur nga aktivistja Evi Kokalari (Angelakis), duke lënë në fuqi vendimin nr. 43, datë 11.10.2022, të Gjykatës së Posaçme të Apelit për Korrupsionin dhe Krimin e Organizuar, mëson Skyweb.al.
Vendimi pritet të shpallet në orët në vijim.
Me këtë vendim, përfundimisht mbyllet përpjekja ligjore e Kokalarit për të çuar për gjykim penal deputetin e Partisë Demokratike, Ervin Salianji, për akuzat e shpifjes dhe fyerjes publike.
Kokalari e paditi Salianjin pas një interviste televizive ku ai e kishte cilësuar si “skizofrene” dhe kishte bërë aludime për përfshirje të bashkëshortit të saj në partinë greke Agimi i Artë, të cilën e përshkroi si të financuar nga qarqe antishqiptare. Padia u regjistrua për shpifje dhe fyerje, por Gjykata e Posaçme vendosi të pushojë çështjen penale për shpifje, vendim që u konfirmua nga Apeli dhe tashmë edhe nga Gjykata e Lartë.
Megjithatë, në një procedim të veçantë civil, Salianji është dënuar nga Gjykata e Posaçme për fyerje, duke u gjobitur me 50 mijë lekë. Ai nuk është shpallur fajtor për shpifje, ndryshe nga pretendimet fillestare të paditëses.
Vendimi i sotëm i Gjykatës së Lartë i jep fund një përplasjeje të zgjatur ligjore dhe politike mes deputetit demokrat dhe aktivistes që mbështet publikisht Sali Berishën. /skyweb.al
