Këshilli i Ministrave ka miratuar një vendim të rëndësishëm që i hap rrugë bashkëpunimit mes kompanisë shtetërore “KAYO” dhe sektorit privat për krijimin e një shoqërie të përbashkët që do të prodhojë dhe tregtojë armë të kalibrave të vegjël, të mesëm dhe dronë në territorin e Shqipërisë.
Vendimi parashikon që “KAYO”, sh.a., të hyjë në negociata me kompani private për të ngritur një sipërmarrje të re aksionare, ku kompania shtetërore do të zotërojë jo më pak se 20% të aksioneve.
Kontributi i “KAYO”-s në këtë partneritet do të jetë një sipërfaqe prej të paktën 5 000 m², që do t’i vihet në dispozicion shoqërisë së përbashkët për përdorim, pa u humbur pronësia shtetërore.
Për të pranuar bashkëpunimin, partnerët privatë duhet të angazhohen për një investim fillestar minimal prej 50 milionë eurosh, të ofrojnë teknologji për prodhimin ose montimin e armatimeve dhe dronëve sipas nevojave të ushtrisë dhe institucioneve të sigurisë, si dhe të sigurojnë rrjetin për shpërndarjen e produkteve në eksport.
Gjithashtu, vendimi kërkon që administratori i shoqërisë së re të caktohet me dakordësinë e “KAYO”-s, ndërsa të paktën 40% e anëtarëve të këshillit drejtues apo mbikëqyrës do të emërohen nga pala shtetërore. “KAYO” do të ketë gjithashtu të drejtën e vetos për vendime të rëndësishme në shoqëri.
Për sigurinë e objektit dhe personelit, do të kujdesen Forcat e Armatosura të Shqipërisë, në zbatim të legjislacionit përkatës ushtarak.
Ky hap vjen si pjesë e një strategjie të re për fuqizimin e industrisë kombëtare të mbrojtjes dhe vendos Shqipërinë në një kurs të ri bashkëpunimi me sektorin privat në fushën e prodhimit ushtarak./skyweb.al
