Drejtoria e Përgjithshme e Tatimeve ka njoftuar zbardhjen e një rasti të rëndë evazioni fiskal, ku një subjekt tatimpagues në Tiranë kishte fshehur 585,000 euro të ardhura të padeklaruara, gjatë një periudhe që shtrihet në më shumë se një vit.
Hetimi është realizuar nga strukturat e Hetimit Tatimor dhe u vu në lëvizje falë një denoncimi qytetar, i cili çoi në zbulimin e një skeme të sofistikuar mashtrimi me detyrimet tatimore. Sipas Drejtorisë së Tatimeve, subjekti në fjalë nuk lëshonte fatura tatimore për shërbimet dhe kishte punonjës të pasiguruar, duke manipuluar në mënyrë të qëllimshme të dhënat financiare.
“Falënderojmë qytetarët që i janë bashkuar përpjekjes sonë të vazhdueshme për të vendosur ligjshmëri fiskale,” thuhet në reagimin zyrtar të DPT-së.
Megjithatë, ndërkohë që kontrollet e administratës tatimore janë përqendruar kryesisht në Tiranë, shqetësime të vazhdueshme vijnë nga qytetarët për mënyrën e funksionimit të shumë bizneseve në jug të vendit, veçanërisht në zonat bregdetare gjatë sezonit turistik.
Skyweb.al ka konstatuar restorante të njohura në jug, në vend që të pajisin klientët me faturë tatimore, u dorëzojnë atyre letra të zakonshme të shkruara me dorë, ku janë listuar vetëm çmimet, duke u kërkuar pagesë për to si të ishin dokument zyrtar. /skyweb.al
