Danimarka ka bërë një hap historik në mbrojtjen e identitetit personal në epokën e inteligjencës artificiale.
Një projektligj i ri u jep qytetarëve të drejtën e autorit mbi fytyrën, zërin dhe trupin e tyre, duke i dhënë fund përdorimit pa leje të këtyre elementeve në krijime digjitale apo deepfake.
Sipas nismës, çdo përdorim i imazhit ose zërit të një personi nga AI pa pëlqimin e tij do të konsiderohet shkelje e ligjit, duke hapur rrugën kërkesave për dëmshpërblim.
Ligji parashikon gjithashtu gjoba të rënda për platformat që nuk heqin përmbajtjen e paligjshme pasi njoftohen, ndërsa përjashtime do të ketë për parodinë, satirën dhe raportimet mediatike me interes publik.
Autoritetet daneze e shohin këtë si një hap kyç në luftën kundër manipulimeve digjitale dhe dezinformimit, duke i dhënë individëve kontroll të plotë mbi identitetin e tyre.
Ekspertët e quajnë nismën një precedent të rëndësishëm për gjithë Evropën dhe një model që mund të ndiqet nga vende të tjera në përballjen me rreziqet e AI. /skyweb.al
