Një ditë do ta ridizajnojmë internetin për mjete të tilla. Deri atëherë, na pret një periudhë kaotike.
Javën e kaluar, gishti im qëndroi pezull mbi butonin e shkarkimit të Muse, inteligjencës së re artificiale të Meta-s. Për një çast, u ndjeva paksa i frikësuar nga telefoni im.
Muse synon të ndihmojë. Është një agjent i inteligjencës artificiale — një mjet që mund të dalë në botën online dhe të kryejë detyra pa mbikëqyrje njerëzore. Duke përdorur shfletuesin e vet të internetit, Muse mund të anulojë anëtarësimin në palestër, të negociojë me punonjësit e shërbimit ndaj klientit, të blejë ushqime, të ftojë miq në festa — çfarëdo që t’i kërkoni. Së shpejti do të mund të bëjë edhe telefonata.
Është agjenti i parë falas dhe me funksione të plota i lançuar nga një kompani e madhe. Miliona njerëz e shkarkuan Muse gjatë javëve të para, ndërsa OpenAI sapo ka njoftuar agjentin e vet të ri. Të tjerë po vijnë. Jemi në agimin e një kapitulli të ri për internetin. Si do të jetë ai?
Sipas ekspertëve me të cilët fola, interneti së shpejti mund të bëhet edhe më frustrues. Këta agjentë mund të shkaktojnë një zinxhir problemesh që mund të tronditë themelet e infrastrukturës digjitale. Ka shumë gjasa që të kalojmë një periudhë kaosi në internet.
Interneti u ndërtua për njerëzit, të cilët kanë kohë dhe durim të kufizuar. Inteligjencat artificiale nuk kanë të njëjtat kufizime. Me shumë mundësi, do të na duhet të konkurrojmë me robotët për biletat e koncerteve dhe për rezervimet e takimeve. Bizneset e vogla mund të mbyten nga kërkesat dhe mesazhet e panumërta të krijuara nga makineritë.
Inteligjencat artificiale nuk shohin reklamat dhe faqet e internetit që varen nga të ardhurat prej tyre tashmë po përballen me vështirësi. Ju mund të përfundoni të varrosur nën cikle të pafundme verifikimesh për të provuar se jeni njeri. Dhe nëse përdorni këto mjete të inteligjencës artificiale, disa prej tyre mund t’ju tradhtojnë.
Në fund, do ta rindërtojmë internetin për t’iu përshtatur kësaj realiteti të ri. Ndoshta ajo botë do të jetë më e mirë. Por deri atëherë, gjërat mund të bëhen të shëmtuara.
“Imagjinoni sikur të mos ketë fare rregulla qarkullimi. Dhe ju të nxirrni miliarda makina — agjentët e inteligjencës artificiale — dhe thjesht t’i lini të lëvizin nëpër kënde lojërash, duke përplasur fëmijët. Kjo është situata ku ndodhemi”, thotë Ramesh Raskar, profesor i asociuar në Massachusetts Institute of Technology (MIT) në SHBA, i cili studion agjentët e inteligjencës artificiale. “Është një moment vendimtar.”
Për të hyrë në këtë “rrugë”, Muse kërkon ndoshta më shumë besim dhe informacion të ndjeshëm se çdo produkt tjetër në historinë e perandorisë së Mark Zuckerberg.
Kur e hapni, avatari i ëmbël dhe miqësor ju kërkon emrin. Më pas ju kërkon kontroll të plotë mbi Gmail-in, kalendarin dhe të gjithë kompjuterin tuaj, nëse përdorni një Mac.
Dhe aty, ndërsa shikoja butonin e shkarkimit, ndjeva një moment paniku. Njerëzit më luteshin të mos e bëja.
“Unë nuk do ta përdorja”, thotë Patrick Wardle, bashkëthemelues i Objective-See, një fondacion jofitimprurës amerikan për sigurinë kibernetike, i cili zbuloi probleme serioze në aplikacionin Muse.
“Personalisht, do të të thosha ta çinstaloje fare.”
