Nga kjo javë kanë hyrë në fuqi rregulloret e reja të Bankës së Shqipërisë, që synojnë të lehtësojnë pagesat dhe transfertat kombëtare duke ulur ndjeshëm kostot për qytetarët.
Sipas rregullores, të gjitha transfertat elektronike deri në 40 mijë lekë do të kryhen pa komision, duke dyfishuar pragun që më parë ishte 20 mijë lekë.
Për shumat nga 40 mijë deri në 1 milion lekë, tarifa maksimale është vendosur 100 lekë, shumë më e ulët se më parë kur arrinte deri në 500 lekë në sportel.
Për transfertat mbi 1 milion lekë deri në 5 milion lekë, komisioni nuk mund të kalojë 500 lekë, ndërsa për pagesat deri në 10 milion lekë tarifa tavan është 1 mijë lekë. Shumat deri në 15 milion lekë nuk do të ngarkohen me më shumë se 1,400 lekë.
Një tjetër risi është favorizimi i pagesave online, ku të gjitha komisionet janë përgjysmuar. Kjo do të thotë se, për shembull, një transfertë deri në 1 milion lekë e bërë me internet banking nuk mund të kushtojë më shumë se 50 lekë.
Edhe transfertat kombëtare në Euro janë përfshirë në këtë reformë. Për shumat deri në 150 mijë euro, komisioni maksimal nuk mund të jetë më i lartë se 0.02% të vlerës së transferuar, ndërsa për transaksionet elektronike kufiri bie në 0.01%. Komisioni minimal për transfertat me e-banking është 2 euro, krahasuar me 6 euro për transfertat në letër.
Përveç uljes së kostove, Banka e Shqipërisë ka vendosur edhe afate më të shpejta për përpunimin e pagesave: të gjitha transfertat kombëtare duhet të përfundojnë brenda ditës së punës. /skyweb.al
