25% e grave shqiptare të moshës 15 deri 49 vjeç vuajnë nga anemia për shkak të mungesës së hekurit, sipas raportit më të fundit të UNICEF mbi ushqyerjen dhe shëndetin global.
Raporti krahason të dhënat e vitit 2023 me ato të 2012-s dhe tregon se Shqipëria ka shënuar një rritje me 5% të rasteve, duke e vendosur vendin në kategorinë e shteteve që nuk kanë bërë progres drejt objektivave të Kombeve të Bashkuara për zhvillimin e qëndrueshëm deri në vitin 2030.
Në rang global, mesatarja e grave me anemi është 31%, ndërsa në Europën Qendrore dhe Lindore kjo shifër është 21%. Shqipëria qëndron mbi këtë mesatare me 25%.
Përkeqësime të ngjashme janë regjistruar edhe në rajon: në Mal të Zi nga 21% në 26%, në Maqedoninë e Veriut nga 17% në 22%, në Serbi nga 21% në 25% dhe në Kroaci nga 20% në 23%. Edhe vende të BE-së si Greqia, Italia dhe Franca kanë shënuar rritje të ndjeshme të rasteve.
Instituti i Shëndetit Publik kujton se anemia është një problem shëndetësor që prek veçanërisht gratë, fëmijët e vegjël dhe personat me sëmundje kronike.
Sipas ISHP-së, rastet e lehta trajtohen me ndryshime në dietë dhe suplemente hekuri. Konsumi i produkteve të pasura me hekur, si mishi, veza, mëlçia, fasulet, susami dhe frutat e kuqe, ndihmon në rikthimin e niveleve normale të hemoglobinës.
Të dhënat e UNICEF theksojnë nevojën për politika më të forta në ushqyerje dhe shëndet publik, në mënyrë që Shqipëria të mos mbetet pas në objektivat globale për përmirësimin e mirëqenies shëndetësore të grave dhe fëmijëve. /skyweb.al
